លោក បៃដិន ថា រុស្ស៊ី នឹងធ្លាក់ខ្លួនខ្សោយពីសង្គ្រាមជាមួយ អ៊ុយក្រែន

ប្រធានាធិបតីអាមេរិកលោក ចូ បៃដិន បាននិយាយកាលពីថ្ងៃពុធ ខណៈដែលរដ្ឋបាលរបស់លោកបានបន្តបង្កើនការដាក់ទណ្ឌកម្មសេដ្ឋកិច្ចលើទីក្រុងមូស្គូថា ប្រទេសរុស្ស៊ីនឹងធ្លាក់ខ្លួនខ្សោយពីសង្គ្រាមរបស់ខ្លួនលើអ៊ុយក្រែន ។

លោក បៃដិន បាន​និយាយ​ពេល​ធ្វើ​ទស្សនកិច្ច​នៅ​រដ្ឋ Wisconsin ​ថា​ “​រុស្ស៊ី​នឹង​ចុះ​ខ្សោយ អំឡុងសង្គ្រាម និងក្រោយសង្គ្រាម ហើយ​ពិភពលោក​កាន់តែ​ខ្លាំង​ជាង​មុន​ទៅ​ទៀត ខណៈបច្ចុប្បន្នលោក ពូទីន កំពុងឯកោពីពិភពលោកច្រើនជាងពេលណាៗទាំងអស់” ។

រហូតមកដល់ពេលនេះ ជនស៊ីវិលជាង ២,០០០ នាក់ត្រូវបានសម្លាប់ ចាប់តាំងពីប្រទេសរុស្ស៊ីបានចាប់ផ្តើមសង្រ្គាមរបស់ខ្លួនលើអ៊ុយក្រែនកាលពីថ្ងៃទី ២៤ ខែកុម្ភៈ ខណៈដែលទីភ្នាក់ងារជនភៀសខ្លួនរបស់អង្គការសហប្រជាជាតិប៉ាន់ស្មានថា មនុស្សជាង ៨៧៤,០០០ នាក់បានភៀសខ្លួនពីអ៊ុយក្រែនទៅកាន់ប្រទេសជិតខាង ។

ការវាយលុកនេះត្រូវបានឆ្លើយតបដោយកំហឹងពីអន្តរជាតិជាមួយនឹងសហភាពអឺរ៉ុប សហរដ្ឋអាមេរិក និងចក្រភពអង់គ្លេស ក្នុងចំណោមប្រទេសដទៃទៀត ដែលអនុវត្តទណ្ឌកម្មហិរញ្ញវត្ថុដ៏តឹងរ៉ឹងលើទីក្រុងមូស្គូ ។

ខណៈសង្គ្រាមនៅតែបន្តផ្ទុះឡើង រុស្ស៊ីក៏បានបង្កើនការទម្លាក់គ្រាប់បែកពីលើអាកាស និងប្រើកាំភ្លើងធំវាយលុកលើអ៊ុយក្រែនក្នុងសប្តាហ៍នេះ ជាពិសេសទៅលើរដ្ឋធានី កៀវ និងទីក្រុងធំទី ២ របស់ខ្លួនគឺ Kharkiv ដែលជាកន្លែងការផ្ទុះដ៏ធំបានកក្រើកទីលាន Freedom Square កាលពីថ្ងៃអង្គារ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ពេលនេះ អាមេរិក បញ្ជូនមីស៊ីលរាប់រយគ្រាប់ទៅ អ៊ុយក្រែន ហើយ