មន្ទីរធម្មការខេត្តស្ទឹងត្រែង ព្រមានម្ចាស់ហ្វេសប៊ុកដែលបង្ហោះរូបព្រះសង្ឃគ្រងស្បង់ចីពរគង់លើព្រះគោថ្ម

មន្ទីរធម្មការនិងសាសនាខេត្តស្ទឹងត្រែង ឱ្យម្ចាស់ហ្វេសប៊ុកលុបរូបថតព្រះសង្ឃគ្រងស្បង់ចីពរគង់លើព្រះគោថ្ម នៅស្រុកថាឡាបរិវ៉ាត់ ក្នុងខេត្តស្ទឹងត្រែង ហើយសុំទោសជាសាធារណៈ ថានេះជាការប្រមាថមើលងាយផ្នែកព្រះពុទ្ធសាសនា ព្រោះកន្លែងរូបសំណាកព្រះគោនេះ ជាកន្លែងសក្ការៈបូជា មានជំនឿរបស់ប្រជាពលរដ្ឋនៅខេត្តស្ទឹងត្រែង។     

លោក មៀច អ៊ាង ប្រធានមន្ទីរធម្មការនិងសាសនាខេត្តស្ទឹងត្រែងបានបញ្ជាក់ថា នេះជាករណីប្រព្រឹត្តទង្វើមិនគប្បីបង្កើតឱ្យមានប្រតិកម្មពីពុទ្ធបរិស័ទ អាជ្ញាធរ និងព្រះសង្ឃក្នុងខេត្តស្ទឹងត្រែង ហើយសាលាគណខេត្ត និងមន្ទីរធម្មការនិងសាសនា រដ្ឋបាលស្រុកថាឡាបរិវ៉ាត់ ក៏បានចេញលិខិតថ្កោលទោស ចំពោះទង្វើរមិនសមរម្យនេះ ដែលបានប្រព្រឹត្តអំពើមើលងាយ ហើយយករូបភាពទៅបង្ហោះតាមបណ្ដាញសង្គមហ្វេសប៊ុកកាលពីថ្ងៃទី២៨ ខែកុម្ភៈ ឆ្នាំ២០២២ ។     

លោកប្រធានមន្ទីរសុំឱ្យម្ចាស់ហ្វេសប៊ុកដែលបានបង្ហោះរូបភាពនេះ ត្រូវលុបរូបភាពនេះចេញជាបន្ទាន់ ព្រមទាំងសុំទោសជាសាធារណៈ ចំពោះទង្វើរបស់ខ្លួនដែលបានប្រព្រឹត្ត បើពុំដូច្នោះទេរដ្ឋបាលស្រុក ព្រមទាំងមន្ទីរធម្មការ និងសាសនាខេត្តនឹងចាត់វិធានការតាមផ្លូវច្បាប់ជាធរមាន។      

ព្រះតេជគុណ ពុទ្ធ យ៉ាំ ចៅអធិការវត្តថាឡាបរិវ៉ាត់ មានសង្ឃងីការថា នេះក៏ជាប្រមាថមកលើសេចក្តីសុខរបស់ព្រះសង្ឃ និងប្រជាពលរដ្ឋទូទៅនៅក្នុងខេត្តស្ទឹងត្រែងតែម្តង ព្រោះនៅជិតដល់ថ្ងៃចូលឆ្នាំប្រពៃណីជាតិខ្មែរយើងនេះ អាជ្ញាធរនិងពុទ្ធបរិស័ទនឹងរៀបចំធ្វើបុណ្យទៅតាមសព្វដង ដើម្បីសុំសេចក្តីសុខចំរើន។ 

ព្រះតេជគុណមានសង្ឃដីការបន្តថា រូបភាពបង្ហោះលើបណ្ដាញសង្គមជាសាធារណៈនេះ ជាទង្វើរប្រមាថយ៉ាងធ្ងន់ធ្ងរមក​លើទីសក្ការៈ និងរំលោភបំពានលើទំនៀមទំលាប់ សិទ្ធិជំនឿរបស់ប្រជាពលរដ្ឋគ្រប់ជនជាតិដែលបាននាំគ្នាគោរពតាំងពីដូនតាមក។     

សូមបញ្ជាក់ថា បុព្វជិតអង្គនេះ និមន្តមកពីវត្តពើងបាក់រទេះ ក្នុងស្រុកជីក្រែង ខេត្តសៀមរាប មានព្រះនាម សរ រស្មី នៅក្នុងរូបភាពគង់លើព្រះគោថ្មក្នុងស្រុកថាឡាបរិវ៉ាត់នេះ គឺជាការប្រព្រឹត្តជាកាយវិការដ៏ឆ្គាំឆ្គងក្នុងឥរិយាបថបង្ហាញភាពមិនសមរម្យជាសមណៈដែលជាសាវៈរបស់ព្រះពុទ្ធសាសនាឡើយ៕

អត្ថបទ៖ ងិនលីម