រុស្ស៊ី ប្រកាសបទឈប់បាញ់នៅ អ៊ុយក្រែន ចាប់ពីម៉ោង ១០ ថ្ងៃនេះ

ប្រទេស រុស្ស៊ី បានប្រកាសបទឈប់បាញ់នៅក្នុងប្រទេស អ៊ុយក្រែន ចាប់ពីម៉ោង ១០ ថ្ងៃនេះ ដើម្បីបើកច្រករបៀងមនុស្សធម៌សម្រាប់ជនស៊ីវិលភៀសខ្លួន ចេញពីទីក្រុង។

ក្រសួងការពារជាតិរុស្ស៊ីបានប្រាប់អ្នកយកព័ត៌មាននៅថ្ងៃសៅរ៍នេះថា “ថ្ងៃនេះ នៅថ្ងៃទី០៥ ខែមីនា វេលាម៉ោង ១០ព្រឹក ម៉ោងនៅទីក្រុងម៉ូស្គូ ភាគីរុស្ស៊ីបានប្រកាសបទឈប់បាញ់ និងបើកច្រករបៀងសម្រាប់ចេញចូលរបស់ជនស៊ីវិលរវាងតំបន់ Mariupol និង Volnovakha”។ ក្រសួង​បាន​បន្ថែម​ថា ច្រក​របៀង និង​ផ្លូវ​ចេញ​ចូលមួយនេះ​ត្រូវ​បាន​ព្រមព្រៀង​ជាមួយ​ភាគី​អ៊ុយក្រែន ដើម្បីជម្លៀសប្រជាជន។

ដោយឡែក ជំនួយការប្រធានាធិបតីអ៊ុយក្រែន លោក Mikhail Podolyak បានឱ្យដឹងថា មនុស្សប្រហែល ២សែននាក់កំពុងព្យាយាមជម្លៀសចេញពីតំបន់ Mariupol ខណៈមនុស្ស ២ម៉ឺននាក់ផ្សេងទៀត កំពុងចង់បានចាកចេញពី ទីក្រុង Volnovakha ក្នុងតំបន់ Donetsk។

អាជ្ញាធបានបន្ថែមថា បទឈប់បាញ់នៅតំបន់ Mariupol នឹងអនុវត្តចាប់ពីម៉ោង ១០:០០ ព្រឹក ដល់ ៥:០០ ល្ងាច ម៉ោងនៅទីក្រុងម៉ូស្គូ។ ចំណែកការជម្លៀសប្រជាជនស៊ីវិលនឹងត្រូវចាប់ផ្តើមនៅម៉ោង ១២:០០ យប់ ម៉ោងនៅទីក្រុងម៉ូស្គូ៕

ប្រែសម្រួល៖ សន្យា

ប្រភព៖ Sputnik

ចុចអាន៖ អាមេរិក ថា រុស្ស៊ី​ នឹង​ពង្រាយ​ទាហាន​ស៊ីឈ្នួល​រហូតដល់ ១ ពាន់នាក់ទៅ អ៊ុយក្រែន