សន្តិសុខសង្គម

អាជីវករលក់ដូរលើចិញ្ចើមផ្លូវម៉ៅសេទុង បិទផ្លូវមិនឲ្យធ្វើចរាចរណ៍ ខណៈអាជ្ញាធរចុះរៀបចំសណ្តាប់ធ្នាប់

បានផុស

៣ years មុន

នៅ

ថ្ងៃចន្ទ ៧ មីនា ២០២២

ដោយ

អាជីវករលក់ដូរលើចិញ្ចើមផ្លូវម៉ៅសេទុង ត្រង់ចំណុចស្តុបកោសដូង ក្នុងមូលដ្ឋានខណ្ឌទួលគោកបានលើកគ្នាជាច្រើននាក់តវាជាមួយអាជ្ញាធរ រហូតធ្វើការបិទកំណាត់ផ្លូវម៉ៅសេទុង មិនឲ្យអ្នកដំណើរធ្វើចរាចរណ៍ឆ្លងកាត់ ខណៈដែលអាជ្ញាធរ ចុះរៀបចំសណ្តាប់ធ្នាប់តាមដងផ្លូវនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្ទុះនូវការតវ៉ានេះ បានកើតឡើងកាលពីរាត្រីថ្ងៃទី ០៦ ខែមីនា ឆ្នាំ ២០២២ នេះ ខណៈដែលគណៈបញ្ជាការឯកភាពខណ្ឌទួលគោក ដឹកនាំកម្លាំងចុះរៀបចំសណ្តាប់ធ្នាប់តាមដងផ្លូវម៉ៅសេទុង ទៅតាមការណែនាំរបស់លោក ឃួង ស្រេង អភិបាលរាជធានីភ្នំពេញ ដើម្បីឲ្យដងផ្លូវមួយនេះមានសណ្តាប់ធ្នាប់ របៀបរៀបរយ និងមានសោភណ្ឌភាពល្អប្រសើរឡើងវិញ ដោយសារថា កំណាត់ផ្លូវនេះ ត្រូវបានបងប្អូនអាជីវករលក់ដូរ បន្លែ ផ្លែឈើមួយចំនួន រំលោភយកធ្វើជាកម្មសិទ្ធិក្នុងការលក់ដូរ មិនខ្វល់ពីការកកស្ទះចរាចរណ៍ឡើយ។

មន្ត្រីរដ្ឋបាលខណ្ឌទួលគោក ដែលជាអ្នកដឹកនាំលើការងាររៀបចំសណ្តាប់ ក្នុងប្រតិបត្តការណ៍នេះ បានអោយដឹងថា នាយប់ថ្ងៃទី០៦ ខែមីនា ឆ្នាំ ២០២២ គណៈបញ្ជាការឯកភាពខណ្ឌទួលគោក បានដឹកនាំកម្លាំងចុះរៀបចំសណ្តាប់ធ្នាប់តាមដងផ្លូវម៉ៅសេទុង ហើយក៏ត្រូវបានអាជីវករខឹងសំបារ ដោយការលើកគ្នាតវា ដោយដាក់បិទផ្លូវតែម្តង។ សកម្មភាពនេះ ត្រូវបានអាជ្ញាធរធ្វើការសម្របសម្រួលជាមួយពួកគាត់ សំខាន់កុំឲ្យគាត់បិទផ្លូវធ្វើឲ្យប៉ះពាល់ដល់ប្រជាពលរដ្ឋ ដែលជាអ្នកដំណើរ។ មន្ត្រីរដ្ឋបាលខណ្ឌទួលគោកដដែលបានបញ្ជាក់ថា ការងារនៃការរៀបចំសណ្តាប់ធ្នាប់នេះ អាជ្ញាធរនូវតែអនុវត្តដដែល ដោយពេលនេះយើងបាននិងកំពុងរកមធ្យោបាយល្អៗ ដើម្បីដោះស្រាយជាមួយពួកគាត់។

គួរបញ្ជាក់ថា ក្នុងកិច្ចប្រជុំបន្ទាន់មួយ កាលពីរសៀលថ្ងៃទី០៤ ខែមិនា ឆ្នាំ ២០២៣ នៅសាលាខណ្ឌគោកក្រោមវត្តមានលោកមាន ចាន់យ៉ាដា អភិបាលរងរាជធានីភ្នំពេញ តំណាងឲ្យលោក ឃួង ស្រេងអភិបាលរាជធានីភ្នំពេញ លោក ជា ពិសី អភិបាលខណ្ឌទួលគោក លោកស្នងការរងនគរបាលរាជធានីភ្នំពេញ ,មេបញ្ជាការរងកងរាជអាវុធហត្ថខណ្ឌទួលគោក និងមន្ត្រីពាក់ព័ន្ធមួយចំនួនទៀតនោះ អាជ្ញាធររាជធានីភ្នំពេញបានធ្វើការណែនាំឱ្យគណៈបញ្ជាការឯកភាពខណ្ឌទួលគោករៀបចំសណ្តាប់ធ្នាប់សាធារណៈលើបណ្តោយផ្លូវខាងលើនេះឲ្យបានល្អ ដោយរដ្ឋបាលរាជធានីភ្នំពេញ ទុករយៈពេលឲ្យអនុវត្តការងារនេះឲ្យបានជោគជ័យ ក្នុងរយៈពេលមួយសប្តាហ៍ ដោយត្រូវអនុវត្តចាប់ពីយប់ថ្ងៃ ០៤ មិនានេះតទៅ ជាមួយនិងការបែងចែកក្រុមការងារជា ២ ក្រុម ១ ក្រុមចាប់ពីម៉ោង ០៩ យប់រហូតដល់ម៉ោង ២ ទៀបភ្លឺ និក្រុមទី ២ ចាប់ផ្ដើមអនុវត្តចាប់ពីម៉ោង ០២ ទៀបភ្លឺ រហូតដល់ម៉ោង ០៧ ព្រឹក៕

អត្ថបទ៖ ស្រីរ័ត្ន