ព័ត៌មានជាតិ

អាជ្ញាធរស្រុកឯកភ្នំ កែលំអបឹងបុរាណ ជាតំបន់ទេសចរណ៍ថ្មី

បានផុស

៤ years មុន

នៅ

ថ្ងៃចន្ទ ១៤ ធ្នូ ២០២០

ដោយ

អភិបាលស្រុកឯកភ្នំ ខេត្តបាត់ដំបង បានអះអាងថា ការជីក និងស្តាបឹងបុរាណអាយុ១០០០ឆ្នាំ ដែលគោករាក់រាប់ឆ្នាំមកហើយ គឺដើម្បីទាញយកទឹកសម្រាប់ស្រោចស្រពប្រើប្រាស់នៅរដូវដែលខ្វះខាតទឹក ក៏ដូចជាពង្រីកសក្ដានុពលទេសចរណ៍ លើកកម្ពស់ជីវភាពរបស់ប្រជាពលរដ្ឋក្នុងស្រុក។

លោក ម៉ិល សុផល អភិបាលស្រុកឯកភ្នំ បានឲ្យដឹងនៅថ្ងៃទី១៤ ខែធ្នូ ឆ្នាំ២០២០នេះថា បឹងដែលបានជីក និងស្តានេះ គឺជាបឹង(តាគម)ដែលកើតឡើងតាំងពីសតវត្សន៍ទី១១ ដោយឆ្លងកាត់ជាច្រើនសម័យកាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា រហូតដល់បច្ចុប្បន្ននេះ បឹងបានគោករាក់ស្ទើរតែរាបស្មើនឹងមាត់ច្រាំង ហើយទឹកមានតែត្រឹមតិចតួចប៉ុណ្ណោះ។ដោយមើលឃើញសភាពបែបនេះ ប្រជាពលរដ្ឋរាប់រយគ្រួសារនៅក្នុងភូមិសាស្ត្រនេះបានឯកភាពគ្នាស្នើសុំឲ្យអាជ្ញាធរស្រុក ឲ្យជួយជីកស្តាឡើងវិញ ដើម្បីទទួលបានទឹកស្រោចស្រពដំណាំនិងប្រើប្រាស់ប្រចាំថ្ងៃ ។

លោកថា អាជ្ញាធរមើលឃើញថា អត្ថប្រយោជន៍បឹងស្តុកទឹកដ៏ធំនេះ ពិតជាបានបង្កលក្ខណ:យ៉ាងល្អប្រសើរដល់ប្រជាពលរដ្ឋជាច្រើន ទាំងនៅតំបន់នេះ និងទាំងនៅក្នុងស្រុកថ្មគោល ដែលមានទីតាំងក្បែរគ្នាអាចប្រើប្រាស់ទឹកបានទាំងរដូវប្រាំង និងរដូវវស្សា ដោយមិនរីងហួតនោះទេ។

អាជ្ញាធររំពឹងថា ក្រោយពីបានជីកនិងស្តាបឹង ដែលមានទំហំ៧ហិកតានេះរួចរាល់ ក៏មានការរៀបចំកែលំអឲ្យប្រែក្លាយជាគោលដៅតំបន់ទេសចរណ៍ ដ៏មានសក្ដានុពលមួយផងដែរ។តាមរយ:ការរៀបចំនេះក៏មានការសាងសង់ជាកូនកោះ១ នៅចំកណ្ដាលបឹង រួចសាងសង់ជាស្ពាននាគ ដើម្បីធ្វើដំណើរទៅកាន់កូនកោះដែលជាកន្លែងសម្រាប់គោរពសក្ការ:បូជាដើម្បីធ្វើការរម្លឹកគុណដល់បុព្វបុរសខ្មែរដែលបន្សល់ទុកនូវប្រភពទឹកដ៏ធំនេះ។បន្ថែមពីនេះទៀត នឹងមានការរៀបចំដាក់ដាំដើមឈើប្រណិតរាប់រយដើម ដើម្បីជាម្លប់សម្រាប់អ្នកទេសចរជ្រកកម្សាន្តមើលផ្ទៃទឹក ក្នុងបឹងដ៏ធំល្វឹងល្វើយនេះគ្រប់ពេលវេលាផងដែរ។

តាមរយៈសមិទ្ធិផលកែច្នៃថ្មីនេះ ក៏នឹងផ្ដល់នូវការងារបង្កើនប្រាក់ចំណូលរបស់ប្រជាពលរដ្ឋមានដូចជាការលក់ដូរចំណីអាហារបែបទំនៀមទម្លាប់បន្លែផ្លែឈើរបស់ខ្មែរ ឬអាហារសម្រន់ជាដើម។

លោកអភិបាលស្រុកអះអាងថា ក្រុមការងារស្រុកមានគម្រោង និងបង្រៀនពីរបៀបអាំងមាន់ស្រែ ឲ្យមានរស់ជាតិឆ្ងាញ់ដល់កសិករ ដើម្បីបំពេញសេចក្ដីត្រូវការរបស់ភ្ញៀវជាតិ-អន្តរជាតិ ដែលចេញពីក្រុងហើយទៅស្រស់ស្រូបយកបរិយាកាសបែបធម្មជាតិ នៅតំបន់នេះ។