បណ្ឌិត សុខ ទូច ៖ ២ឆ្នាំទៀត ត្រីនៅបឹងទន្លេសាប នឹងខ្ទេចអស់គ្មានសល់ទេ បើមិនទប់ស្កាត់ឲ្យទាន់ពេល

លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា និងក្រុមការងារកាលពីសប្តាហ៍មុន បានចុះទៅបឹងទន្លេសាប ដើម្បីចូលរួមបង្ក្រាបបទល្មើសនេសាទដោយផ្ទាល់នៅទីនោះ។ លោក បានគូសបញ្ជាក់ប្រាប់«កម្ពុជាថ្មី»នៅព្រឹកថ្ងៃពុធនេះថា ត្រីនៅបឹងទន្លេសាប នឹងខ្ទេចគ្មានអស់សល់ឡើយក្នុងរយៈពេល២ឆ្នាំខាងមុខ បើសិននៅតែបណ្តែតបណ្តោយ មិនទប់ស្កាត់ឲ្យបានទាន់ពេលវេលា។

លោកបណ្ឌិត សុខ ទូច បានអះអាងថា ក្រុមជនជាតិវៀតណាមដែលកំពុងរស់នៅកម្ពុជា គឺជាអ្នកដែលប្រព្រឹ​ត្តបទល្មើសនេសាទនៅក្នុងបឹងទន្លេសាប។ បើតាមលោកបណ្ឌិត សុខ ទូច បទល្មើសនេសាទដែលកើតឡើងខ្លាំងជាងគេនៅបឹងទន្លេសាប គឺការឆក់ត្រី ដែលការឆក់នេះ មានដូចជា ការឆក់ត្រជាក់ ជាការឆក់យកត្រីអត់ស្រកា។ ការឆក់ក្តៅ គឺជាការឆក់យកត្រីមានស្រកា ហើយនៅពេលនេះ មានការឆក់មួយប្រភេទទៀត គឺឆក់ក្នុងរង្វង់៦០ម៉ែត្រ ដោយប្រមូលយកបានត្រីគ្រប់ប្រភេទទាំងអស់។ លោកបណ្ឌិត សុខ បានគូសបញ្ជាក់ថា ការឆក់ទាំងនេះ គឺឆក់ក្នុងដែនការពារតែម្តង។

កាលពីថ្ងៃទី០៧ ខែមីនា លោកបណ្ឌិតក៏បានបង្ហោះសារហួសចិត្តចំពោះការប្រព្រឹត្តបទល្មើសនេសាទនៅក្នុងបឹងទន្លេសាបនេះ។ លោក បានសរសេរបែបនេះថា៖​«អ្នកមករស់នៅលើទឹកដីខ្ញុំ អ្នកធ្វើមាន ធ្វើបាននៅលើទឹកដីខ្ញុំហើយ ចុះហេតុអ្វីអ្នកកម្ទេចត្រីនៅក្នុងទន្លេខ្ញុំទៀត។ អ្នកគិតទៅមើល អ្នកប្រព្រឹត្តខុសច្បាប់ អ្នកឆក់ត្រជាក់ (យ៉ាំងកាវ), ឆក់ក្តៅ, ឈិបយន្ត, ឆក់ទូកលឿនក្នុងដែន៦០ម៉ែត្របួនជ្រុង ហើយអូសយកត្រីទាំងត្រីស្រកា ទាំងត្រីអត់ស្រកា ឯត្រីតូចៗ អ្នកប្រើការមិនកើត អ្នកបែជាយកទៅធ្វើជី តើឱ្យខ្ញុំអត់ទ្រាំនឹងសកម្មភាពរបស់អ្នកបានយ៉ាងដូចម្តេចទៅ?»៕

ដោយ ៖​ វណ្ណ សុគន្ធា