ឧបនាយករដ្ឋមន្រ្តី ហោ ណាំហុង ស្នើឲ្យឥណ្ឌាពិចារណាជំរុញបង្កើតកិច្ចព្រមព្រៀងពាណិជ្ជកម្មសេរីជាមួយកម្ពុជា

លោកឧបនាយករដ្ឋមន្ត្រី ហោ ណាំហុង នាព្រឹកថ្ងៃទី៩ ខែមីនា ឆ្នាំ២០២២​ នេះ បានស្នើឲ្យប្រទេសឥណ្ឌាពិនិត្យពិចារណាឱ្យមានកិច្ចព្រមព្រៀងពាណិជ្ជកម្មសេរីដើម្បីបង្កើន ទំហំពាណិជ្ជកម្មរវាងប្រទេសទាំងពីរឲ្យកាន់តែធំ ខណៈទំហំពាណិជ្ជកម្មទ្វេរភាគីរវាងប្រទេសទាំងពីរនៅមានកម្រិតតិចតួចនៅឡើយ ។

លោកឧបនាយករដ្ឋមន្ត្រី ហោ ណាំហុង បានស្នើបែបនេះទៅកាន់លោកស្រី Devyani Uttam Khobragade ឯកអគ្គរដ្ឋទូត​ឥណ្ឌា​នៅក្នុងជំនួបពិភាក្សាការងារនាប្រឹកថ្ងៃទី៩ ខែមីនា ឆ្នាំ២០២២ នេះ នៅទីស្តីការគណៈរដ្ឋមន្ត្រី។

លោកឧបនាយករដ្ឋមន្ត្រី ហោ ណាំហុង បានមានប្រសាសន៍លើកឡើងថា កិច្ចសហប្រតិបត្តិការពាណិជ្ជកម្មរវាងប្រទេសទាំងពីរនៅមានកម្រិតតិចតួចនៅឡើយ គួរតែពិចារណាឱ្យមានកិច្ចព្រមព្រៀងពាណិជ្ជកម្មសេរី​ដើម្បីបង្កើនកិច្ចសហប្រតិបត្តិការនៃប្រទេសទំាងពីរ ។

លោកក៏បានថ្លែងអំណរគុណក្នុងនាមរាជរដ្ឋាភិបាលកម្ពុជាដល់រដ្ឋាភិបាលឥណ្ឌា ដែលបានផ្តល់ជំនួយដល់កម្ពុជាក្នុងការជួសជុលប្រាសាទតាព្រហ្មតំាងពីឆ្នាំ២០០៤ ម៉ាស៊ីនបូមទឹក ការដោះមីន ព្រមទាំងអាហារូបករណ៍​ដល់និស្សិតនិងមន្រ្តីរាជការកម្ពុជាព្រមទាំងកម្ចីឥតសំណងផងដែរ។

លោកស្រីឯកអគ្គរដ្ឋទូត ដេវីយ៉ានី ខូប្រាហ្កាដ មានប្រសាសន៍ឆ្លើយតបទៅនឹងសំណើរបស់លោកឧបនាយករដ្ឋមន្ត្រី ដោយបានគាំទ្រឱ្យមានកិច្ចព្រមព្រៀងពាណិជ្ជកម្មសេរី (FTA)រវាងកម្ពុជា-ឥណ្ឌា ដើម្បីជំរុញកិច្ចសហប្រតិបត្តិការឱ្យកាន់តែមានភាពជិតស្និទ្ធនិងស៊ីជម្រៅថែមទៀត។

ទិន្នន័យ​ក្រសួង​ពាណិជ្ជកម្ម​កម្ពុជា​ឱ្យ​ដឹងថា ទំនាក់ទំនង​ពាណិជ្ជកម្ម​ទ្វេភាគី​កម្ពុជា និង​ឥណ្ឌា​ក្នុង​ឆ្នាំ​២០២០ មានតម្លៃ​សរុប ១៩០,១៣ ​លាន​ដុល្លារ​ ធ្លាក់ ២៥,៨១ ​ភាគរយ ពី ២៥៦,២៦ ​លាន​ដុល្លារ​ ក្នុង​ឆ្នាំ​ ២០១៩​។ ក្នុងនោះ​ការនាំចេញ​ទំនិញ​ពី​កម្ពុជា​ទៅ​ឥណ្ឌា​មាន​តម្លៃ៦១,៣៦ ​លាន​ដុល្លារ ធ្លាក់ចុះ ៥,១២ ​ភាគរយ​ពី​ចំនួន ៦៤,៦៧ ​លាន​ដុល្លារនិង​ការនាំ​ទំនិញ​ពី​ឥណ្ឌា​មក​កម្ពុជា​មានតម្លៃ ១២៨,៧៧ ​លាន​ដុល្លារ ធ្លាក់ចុះ ៣២,៩៧ ​ភាគរយ​ពី​ចំនួន ១៩១,៥៩ ​លាន​ដុល្លារ​។

សូមបញ្ជាក់ជូនថា បច្ចុប្បន្ន​កម្ពុជា​ក៏​បាននិង​កំពុង​ធ្វើការ​សិក្សា​វាយតម្លៃ​លទ្ធភាព​ជាក់ស្តែង​ក្នុង​ការរៀបចំ​ឱ្យមាន​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​ (FTA) ​ជាមួយ​ឥណ្ឌា​ផងដែរ​។ កិច្ចការ​នេះ​បាន​រៀបចំ​ធ្វើឡើង​ដោយមាន​កិច្ចសហការ​ជា​ដៃគូ​ជាមួយ​វិទ្យាស្ថាន​ស្រាវជ្រាវ​ឯករាជ្យ​«ERIA»​។ ជា​ក្តី​រំពឹងទុកទំនាក់ទំនង​ដែល​កាន់តែ​ជិតស្និទ្ធ​នឹងនាំមក ​នូវ​ប្រយោជន៍​ទាំង​វិស័យ​ពាណិជ្ជកម្ម​ទំនិញ សេវាកម្មនិង​វិនិយោគរួមទាំង​ការផ្លាស់ប្តូរ​ផ្នែក​បច្ចេកវិទ្យា​សម្រាប់​ប្រទេស​កម្ពុជា​​ ។

គួរបញ្ជាក់ថាបន្ទាប់ពី​ទទួលបាន FTA ជាមួយ​ចិន​កាលពី​ឆ្នាំ​ ២០២០ ក្នុង​ឆ្នាំ ​២០២១ ​កម្ពុជា​​សម្រេចបាន FTA ជាមួយ​ប្រទេស​កូរ៉េ​ខាង​ត្បូង​ ។ ក្រៅពីនោះ​កម្ពុជា​ក៏​បាននិង​កំពុង​ធ្វើការ​សិក្សា​ពី​លទ្ធភាព​ក្នុង​ការបង្កើត​នូវ​កិច្ចព្រមព្រៀង​ពាណិជ្ជកម្ម​សេរី​ជាមួយ​ប្រទេស​មួយចំនួន​ទៀត​ដូចជា ឥណ្ឌា អង់គ្លេស អាមេរិក ជប៉ុន និង ​សហភាព​សេដ្ឋកិច្ច​អឺរ៉ុប-អាស៊ី (EAEU) ​ជាដើម​ ៕

អត្ថបទ៖ ណារី