អាជ្ញាធរខេត្តកំពង់ឆ្នាំងឲ្យក្រុមហ៊ុនវាយកម្ទេចផ្ទះទ្រុឌទ្រោមជួសជុលផ្លូវជូនរដ្ឋវិញ

ឯកឧត្តម សាន់ យូ អភិបាលរងខេត្តកំពង់ឆ្នាំង នៅព្រឹកថ្ងៃទី១៤ ខែមិនា ឆ្នាំ២០២២ បានដឹកនាំក្រុមការងារចុះពិនិត្យការដ្ឋានសំណង់ផ្ទះថ្ម ១៣ល្វែង នៅក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ដែលប៉ុន្មានថ្ងៃនេះ មានការប្រេះហែកថ្នល់កៅស៊ូប្រមាណជាង៥០ម៉ែត្រ ដោយអាជ្ញាធរ និងស្ថាប័នពាក់ព័ន្ធកំពុងសិក្សានិងពិភាក្សាគ្នារកវិធានការដោះស្រាយឱ្យបានទាន់ពេលវេលាទប់ស្កាត់ការរលូតបាក់ផ្លូវកៅ​ស៊ូនៅចំណុចខាងលើកនេះ។

ឯកឧត្តម សាន់ យូ អភិបាលរងខេត្តបញ្ជាក់ថា តាមគោលការណ៍របស់អាជ្ញាធរខេត្ត ក្រុមហ៊ុនត្រូវចាក់ដីលុបរណ្ដៅជីកកកាយគ្រឹះផ្ទះ​ថ្មនេះជាបន្ទាន់ ដើម្បីកុំអោយចិញ្ចើមផ្លូវប្រេះហែកជ្រលក់បាក់បន្តទៀត ។ ចំណែកមន្ទីរសាធារណការដឹកជញ្ជូនខេត្តកំពង់ឆ្នាំង ត្រូវធ្វើការសិក្សាអំពីបច្ចេលទេស ដើម្បីកំណត់អោយក្រុមហ៊ុនជួសជុលផ្លូវដែលរងការខូចខាតនេះឡើងវិញ។​ ការប្រះហែកថ្នល់នេះ​គឺក្រុមការងារបានវាយតម្លៃថា បណ្ដាលមកពីក្រុមហ៊ុនជីកកកាយគ្រឹះសសរផ្ទះថ្មនេះជ្រៅពេក ក្នុងផលប្រយោជន៍យកដែកទៅលក់ ទើបនៅពេលមានភ្លៀងធ្លាក់ធំបណ្ដាលដីស្រុតប្រេះហែកបាក់ស្រុតចិញ្ចើមផ្លូវ ។ ដូច្នេះ​ក្រុមហ៊ុនត្រូវទទួលខុសត្រូវជួស​ជុលផ្លូវកៅស៊ូដែល​រងការខូចខាតនេះជូនរដ្ឋវិញ ។ ចំពោះវិធានការទប់ស្កាត់ក្រុមហ៊ុនត្រូវបញ្ឈប់ការជីកកកាយគ្រិះផ្ទះថ្មនេះបន្តទៀត ។ សមត្ថកិច្ចនឹងត្រូវទប់ស្កាត់ហាមឃាត់កុំឲ្យរថយន្តធុនធ្ងន់បើកបរនៅចំណុចផ្លូវកៅស៊ូដែលមានការប្រេះហែកនេះ៕

អត្ថបទ៖ ឈៀងថារិទ្ធ