ទូតបារាំង ៖ ថ្ងៃនេះជាខួបលើកទី ៣០ឆ្នាំ នៃការដាក់ពង្រាយកងកម្លាំងអ៊ុនតាក់ នៅកម្ពុជា

ស្ថានទូតបារាំងប្រចាំកម្ពុជា តាមរយៈទំព័រហ្វេសប៊ុកផ្លូវការរបស់ខ្លួន បានឲ្យដឹងថា នៅថ្ងៃទី ១៥ ខែមីនា ឆ្នាំ ២០២២នេះ គឺជាខួបលើកទី ៣០ឆ្នាំ នៃការដាក់ពង្រាយកងកម្លាំងអ៊ុនតាក់ នៅកម្ពុជា។ បើតាមស្ថានទូតបារាំង «ថ្ងៃនេះ យើងរំលឹកខួបលើកទី ៣០ឆ្នាំ (ថ្ងៃទី ១៥ ខែមីនា ឆ្នាំ ១៩៩២) នៃការដាក់ពង្រាយកងកម្លាំងយោធា របស់អាជ្ញាធរបណ្តោះអាសន្ន នៃអង្គការសហប្រជាជាតិប្រចាំនៅកម្ពុជា (អ៊ុនតាក់)»។

ប្រភពដដែល បានឲ្យដឹងបន្តថា បន្ទាប់ពីការចុះហត្ថលេខា លើកិច្ចព្រមព្រៀងសន្តិភាពទីក្រុងប៉ារីស៍ ( ២៣ តុលា ១៩៩១) ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃទី ២៧ ខែកុម្ភៈ ឆ្នាំ ១៩៩២ បានសម្រេចបង្កើតអ៊ុនតាក់។ ចាប់ពីថ្ងៃទី ១៥ ខែមីនា ឆ្នាំ ១៩៩២ ដល់ថ្ងៃទី ២៤ ខែកញ្ញា ឆ្នាំ ១៩៩៣ កងយោធាចំនួន ១៥ ៩០០នាក់ មកពី ៤៧ប្រទេស បានមកបំពេញការងារ នៅក្នុងប្រតិបត្តិការដ៏ធំ នៃការរក្សាសន្តិភាពនេះ។

កងមួកខៀវបារាំងប្រមាណ ១៤០០នាក់ (ដែលចំនួនស្ថិតនៅលំដាប់ទី ២ បន្ទាប់ពីប្រទេសឥណ្ឌូនេស៊ី) ត្រូវបានដាក់ពង្រាយនៅកម្ពុជា។ ប្រទេសបារាំង បានដើរតួនាទីសំខាន់ទាំង លើទិដ្ឋភាពយោធា និងការទូត ក្នុងបេសកកម្មមិនធ្លាប់មាន កាលសម័យនោះ។ នេះបើតាមការលើកឡើង របស់ស្ថានទូតបារាំងប្រចាំកម្ពុជា ដដែល។

ស្ថានទូតដដែល បានបញ្ជាក់ទៀតថា ក្នុងអំឡុងពេលនោះដែរ ក្រុមប្រឹក្សាសន្តិសុខអង្គការសហប្រជាជាតិ ក៏បានផ្តល់តួនាទីដល់អ៊ុនតាក់ ក្នុងការបណ្តុះបណ្តាលអ្នកដោះមីនកម្ពុជា និងគ្រប់គ្រងការសម្អាតមីន។ ក្នុងអំឡុង នៃការបណ្តុះបណ្តាលរយៈពេល ៨ខែ មជ្ឈមណ្ឌលសកម្មភាពកម្ចាត់មីនកម្ពុជា ត្រូវបានបង្កើតឡើង (CMAC)។

ក្នុងនោះដែរ អ្នកដោះមីនកម្ពុជាប្រមាណ ១៤០០នាក់ ទទួលបានការបណ្តុះបណ្តាលពីអ៊ុនតាក់។ ក្នុងវិស័យនេះហើយ ដែលកងមួកខៀវបារាំង បានបង្ហាញឲ្យឃើញជាពិសេសនូវជំនាញរបស់ខ្លួន ពោលគឺការដោះមីន និងការបណ្តុះបណ្តាល ស្តីពី ការដោះមីន៕

អត្ថបទ៖ ឃួន សុភ័ក្រ