ក្រសួង​អំពាវនាវ​ឱ្យតំណាងកម្មករ​និយោជិត​ណាហ្គា​ ចូល​ប្រជុំ​ដោះស្រាយ​បញ្ចប់​វិវាទ​នៅ​រសៀល​ថ្ងៃ​នេះ

ក្រសួងការងារ និងបណ្ដុះបណ្ដាលវិជ្ជាជីវៈ បានអំពាវនាវទៅដល់តំណាងភាគីកម្មករនិយោជិត ឱ្យចូលរួមប្រជុំដោះស្រាយវិវាទការងារជាមួយក្រុមហ៊ុនណាហ្គាវើលដ៍ នៅរសៀលថ្ងៃទី ១៨ ខែមីនា បន្ទាប់ពីតំណាងកម្មករនិយោជិត មិនបានចូលរួមប្រជុំតាមការអញ្ជើញរបស់ក្រសួងនៅរសៀលថ្ងៃទី ១៧ ម្សិលមិញ។

ក្រសួងការងារ បានអញ្ជើញតំណាងភាគីកម្មករនិយោជិត និងភាគីនិយោជកមកប្រជុំបន្តដោះស្រាយវិវាទនៅទីស្ដីការក្រសួងនៅរសៀលថ្ងៃទី ១៧ ខែមីនា វេលាម៉ោង ២៖៣០ រសៀល ជាក់ស្ដែងឃើញតែតំណាងភាគីនិយោជកមកចូលរួម រីឯតំណាងភាគីកម្មករនិយោជក នៅតែបន្តមិនមកចូលរួមប្រជុំតាមការអញ្ជើញរបស់ក្រសួងឡើយ ទោះបីក្រសួងខិតខំពន្យល់អំពីកិច្ចខិតខំប្រឹងប្រែងក្នុងការសម្របសម្រួលដោះស្រាវវិវាទតាមផ្លូវច្បាប់ និងដោះលែងឱ្យអតីតបុគ្គលិក ៣ នាក់ផ្សេងទៀតឱ្យនៅក្រៅឃុំជាបណ្ដោះអាសន្នយ៉ាងណាក៏ដោយ។

ក្រសួងការងារទទូចថា ៖ “ជាថ្មីម្ដងទៀត ក្រសួងក៏សូមអំពាវនាវដល់តំណាងភាគីកម្មករនិយោជិត មេត្តាចូលរួមប្រជុំដោះស្រាយនៅថ្ងៃទី ១៨ ខែមីនា ២០២២ នៅវេលាម៉ោង ២៖៣០ រសៀល នៅទីស្ដីការក្រសួង និងអនុវត្តតាមការសន្យារបស់ខ្លួន ដែលស្នើសុំកិច្ចអន្តរាគមន៍ឱ្យបាននៅក្រៅឃុំឱ្យបាននៅក្រៅឃុំបណ្ដោះអាសន្ន ដើម្បីធ្វើជាតំណាងអតីតបុគ្គលិក ក្នុងការដោះស្រាយវិវាទការងារជាមួយក្រុមហ៊ុន ដោយមិនគួរលើកហេតុផលផ្សេងៗខុសពីការសន្យា ឬស្មារតីនៃកិច្ចខិតខំប្រឹងប្រែងដោះស្រាយបញ្ចប់វិវាទការងារនេះឡើយ”។

កញ្ញា ឈឹម ស៊ីថរ ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន ​ណាហ្គាវើលបានប្រាប់សារព័ត៌មានថា នៅថ្ងៃ​នេះ ពួកគាត់​នឹង​ជួប​ពិភាក្សា​គ្នា​ជាមួយ​សមាជិក​សហជីព និង​ក្រុមកូដករ ដើម្បីត្រៀម​យក​ចំណុច​សំខាន់ៗ​មួយ​ចំនួន រួម​មាន ទាមទារឱ្យក្រុមហ៊ុនទទួលយកកម្មករចូល​ធ្វើការងារវិញ ទាមទារប្រាក់អត្ថប្រយោជន៍ស្របតាមច្បាប់ការងារ និងទាមទារទម្លាក់បទចោទ​លើសហជីព សមាជិកសហជីព និងកូដករផ្សេងៗទៀតជាដើម៕