សហភាព​សហព័ន្ធ​យុវជន​កម្ពុជា​ ប្រជុំ​លើក​អាទិភាព​សកម្មភាព​ការងារបន្ត​

​សហភាព​សហព័ន្ធ​យុវជនកម្ពុជា​ (ស.ស.យ.ក.) ​បាន​រៀបចំ​កិច្ចប្រជុំ​គណៈកម្មាធិការ​កណ្តាល​របស់​ខ្លួនរយៈពេល ៣ ថ្ងៃ គឺចាប់ពីថ្ងៃទី ​១៨ ដល់​ថ្ងៃ​ទី ២០ ខែមីនា ឆ្នាំ២០២២នេះ ក្រោមការដឹកនាំ​របស់​លោក ហ៊ុន ម៉ានី ប្រធាន ស.ស.យ.ក. និងអនុប្រធានសមាជិក សមាជិកា​ នៅខេត្តសៀមរាប។

​កិច្ចប្រជុំនេះ​ ត្រូវ​បានរៀបចំ​ឡើង​ដើម្បី​តាមដាន​ និងត្រួតពិនិត្យវឌ្ឍនៈ​ភាពការងារលើ​សេចក្តី​សម្រេច​របស់មហាសន្និបាត ផែនការយុទ្ធសាស្រ្ត និងកម្មវិធីផ្សេងៗ ដែល ស.ស.យ.ក. បានអនុវត្ត​កន្លងមក ក៏ដូចជាដើម្បីកំណត់អាទិភាព និងលើកទិសដៅសកម្មភាពបន្ត ស្វែងរកធាតុចូលបន្ថែម ដើម្បីផ្សាភ្ជាប់ផែនការការងារឲ្យស្របតាមការវិវត្តជាក់ស្តែងរបស់សង្គម និងដើម្បីជាការ​ជួបជុំគ្នា​ពង្រឹង និងពង្រីកសាមគ្គីភាពក្នុងក្រុមគ្រួសារសហភាពសហព័ន្ធយុវជនកម្ពុជា។

លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.) មានប្រសាសន៏ថា ស្នាដៃ និងសមិទ្ធផលរបស់ក្រុមគ្រួសារ ស.ស.យ.ក. ដែលសម្រេចបាននាពេលកន្លងមក បានឆ្លុះបញ្ចាំង​តាម​ផ្នែកសំខាន់ៗរួមមាន៖ ការរៀបចំរចនាសម្ព័ន្ធចាត់តាំង និងការកសាងស.ស.យ.ក. ការការពារ និងថែរក្សាអធិបតេយ្យភាពជាតិ បូរណភាពទឹកដី ឯករាជ្យ​ភាព សន្តិភាព ស្ថិរភាព សេរីភាព និង​សុវត្ថិ​ភាពសង្គម ការលើកកម្ពស់សុខ​ដុមនីយ​កម្មសង្គម អត្ត​សញ្ញាណ និងលើកកិត្តិនាមកម្ពុជា ការជំរុញការអភិវឌ្ឍសេដ្ឋកិច្ច និងពាណិជ្ជកម្ម ការអភិវឌ្ឍ​សមត្ថភាព​យុវជន ការចូលរួម​សកម្មភាព​សង្គម ការលើកកម្ពស់សុខភាព និងវិស័យកីឡា ការជំរុញ​កិច្ចសហការប្រតិបត្តិការ និងទំនាក់​ទំនង​អន្តរជាតិ យុទ្ធនាការពលរដ្ឋល្អ និង កិច្ចការ​ផ្សព្វផ្សាយ និងសាធារណៈមតិ។

ឯកឧត្តម បានបង្ហាញទៀតថា ដើម្បីអនុញ្ញាតឱ្យថ្នាក់ដឹកនាំ និងសមាជិក សមាជិកាគណៈ​កម្មាធិការ​កណ្តាល ស.ស.យ.ក. ដែលតំណាងឲ្យ ស.ស.យ.ក. រាជធានី-ខេត្ត វិស័យ-ក្រសួង-ស្ថាប័ន ក៏ដូច​ជាអង្គការ សមាគម ចំណុះគណៈកម្មាធិការកណ្តាល បានចូលរួមលើកជាសំណួរ ស្នើសុំយោបល់ និងចែករំលែកពីបទពិសោធន៍ការងារ គណៈកម្មការរៀបចំកិច្ចប្រជុំ បានធ្វើការបែងចែក​អង្គប្រជុំ​ជាក្រុមពិភាក្សាចំនួន៣ ដែលកិច្ចពិភាក្សាតាមក្រុមនោះ ត្រូវបានដឹកនាំដោយអនុ​ប្រធាន​ស.ស.យ.ក.​ មួយរូបជាប្រធានដឹកនាំកិច្ចប្រជុំ និងផ្តោតលើប្រធានបទធំៗចំនួន០៣ រួមមាន៖ ការរៀបចំរចនាសម្ព័ន្ធ ស.ស.យ.ក. ថ្នាក់ឃុំ សង្កាត់ ការកៀរគរយុវជនចូលរួម ស.ស.យ.ក. យុវជនក្នុងបុព្វហេតុជាតិ និងការអភិវឌ្ឍអនាគតប្រកបដោយចីរភាព។

ប្រធានបទនៃ​កិច្ចពិភាក្សា​ដែលបានកំណត់ខាងលើនេះ សុទ្ធសឹងតែជាប្រធានបទសំខាន់ៗ ដែលឆ្លើយតបទៅនឹង​សកម្មភាព​កន្លងមកដែល ស.ស.យ.ក.បាន និងកំពុងបំពេញយ៉ាងសកម្ម និងឆ្លុះបញ្ចាំងពី​ការងារអាទិភាព​ស្របតាមចក្ខុវិស័យរបស់ស្ថាប័ន ដើម្បីបន្តបេសកកម្មចូលរួមក្នុងដំណើរ​ការអភិវឌ្ឍនានាលើ​គ្រប់​វិស័យក្នុងប្រទេស។លទ្ធផលនៃកិច្ចប្រជុំបានគូសបញ្ជាក់យ៉ាងច្បាស់ថា ស.ស.យ.ក. បានទទួលនូវ​ការគាំទ្រយ៉ាងខ្លាំងក្លាជាបន្តបន្ទាប់ពីគ្រប់មជ្ឍដ្ឋានទាំងវិស័យសាធារណៈ និងឯកជន ជាពិសេស​លើតួនាទីដ៏សំខាន់ក្នុងការរួមចំណែកជួយសង្គមជាតិ តាមរយៈភាពជាដៃគូ​សហការយ៉ាង​សកម្ម​ជាមួយថ្នាក់នាំ អាជ្ញាធរ និងគ្រប់ភាគីពាក់ព័ន្ធក្នុងថ្នាក់មូលដ្ឋាន ។

ឯកឧត្តម បានបញ្ជាក់យ៉ាងច្បាស់ថា គិតត្រឹមឆ្នាំ២០២១ រចនាសម្ព័ន្ធ ស.ស.យ.ក. នៅថ្នាក់រាជធានី ខេត្ត ស្រុក ខណ្ឌ ឃុំ សង្កាត់ វិស័យ និងសមាជិកអង្គនីតិបុគ្គលរបស់ ស.ស.យ.ក. បានរីកធំធាត់​គួរឱ្យកត់សម្គាល់ ដោយសមាជិកសរុបមានចំនួន ១៨០,៥៨១ នាក់ (ស្ត្រីស្មើនឹង៤២% នៃសមាជិកសរុប)។

ក្រៅពីលទ្ធផលខាងលើ យោងតាមលក្ខខន្តិកៈ និងបទបញ្ជាផ្ទៃក្នុងនៃសហភាព​សហព័ន្ធ​យុវជន​កម្ពុជា ជំពូក៤ ប្រការ៥ និង១៦ កិច្ចប្រជុំគណៈកម្មាធិការកណ្តាល បានសម្រេចធ្វើការបោះឆ្នោត​ជ្រើសតាំងសមាសភាពសមាជិកគណៈកម្មាធិការកណ្តាលចំនួន ០៩រូបបន្ថែម ហើយសមាស​ភាពចំនួន ០៣រូប ក្នុងចំណោមនោះរួមមាន៖ លោក ជា សុមេធី លោក កែវ ពិសិដ្ឋ និងលោក កែ សួនសុភាព បានទទួលការគាំទ្រជ្រើសតាំងជាសមាជិកគណៈអចិន្ត្រៃយ៍នៃគណៈកម្មាធិការកណ្តាល ស.ស.យ.ក.​។

ជាមួយគ្នានេះ កិច្ចប្រជុំគណៈកម្មាធិការកណ្តាលនាពេលនេះ ក៏បាន​ឈាន​ទៅដល់​ការឯកភាពរៀបចំមហាសន្និបាតតំណាងទូទាំងប្រទេស ដែលគ្រោងនឹងប្រព្រឹត្តទៅនៅថ្ងៃទី២៦ និង២៧ ខែវិច្ឆិកា ឆ្នាំ២០២២ ខាងមុខ ដោយមហាសន្និបាតនោះនឹង​មាននូវការរៀបចំ​ជាគណៈ​កម្មការធ្វើវិសោធនកម្មលក្ខន្តិកៈ ដើម្បីបំពេញបន្ថែមនូវតួនាទីប្រធានកិត្តិយស ក៏ដូចជាដើម្បី​បើក​ផ្លូវឲ្យមានការតែងតាំងសមាជិកគណៈកម្មាធិការកណ្តាលឲ្យមានភាពទូលំទូលាយ និងកាន់​តែ​ល្អប្រសើរ។

គួររម្លឹកផងដែរថា កាលពីឆ្នាំ២០១៩ គណៈកម្មាធិការកណ្ដាលសហភាពសហព័ន្ធយុវជនកម្ពុជា បានរៀបចំកិច្ចប្រជុំរបស់ខ្លួន នៅទឹកដីខេត្តសៀមរាបម្តងរួចមកហើយ ដើម្បីបូកសរុបលទ្ធផល​ការ​ងារសម្រេចបាន និងលើកទិសដៅការងារបន្ទាប់ ដែលកិច្ចប្រជុំបែបនេះ ជាដំណើរការ​ជាប្រក្រតីនៃស្ថាប័នយុវជនមួយនេះ។

ដោយឡែកក្នុងឆ្នាំ២០២១ កន្លងទៅនេះ ទោះបីជាស្ថិត​ក្នុង​ស្ថានភាពនៃការឆ្លងរីករាលដាលនៃជំងឺកូវីដ-១៩ ក៏សហភាពសហព័ន្ធយុវជនកម្ពុជា បានរៀប​ចំកិច្ចប្រជុំគណៈកម្មាធិការកណ្តាលរបស់ខ្លួនតាមប្រព័ន្ធអនឡាញ ដែលកិច្ចប្រជុំនោះ​បានអនុញ្ញាត​ឱ្យសមាជិក សមាជិកាអាចបន្តធ្វើការប្រជុំ ពិភាក្សា និងដឹកនាំការងាររបស់ ស.ស.យ.ក. ដោយ​សុវត្ថិភាពផងដែរ៕

អត្ថបទ៖ គឿនវេត