អ្នកឆ្លង​អូមីក្រុង​ ២០ ​ភាគរយ​ រង​ផលវិបាក​ក្រោយ​ជាសះស្បើយ​

តាមការសិក្សារបស់អង្គការសុខភាពពិភពលោក បង្ហាញថា មានអ្នកដែលឆ្លងជំងឺកូវីដបំប្លែងថ្មី អូមីក្រុង​ ២០ ភាគរយ នៃអ្នកជាសះស្បើយ ទទួលរងផលវិបាក ក្រោយពីព្យាបាលជាសះ​ស្បើយ​ពីជំងឺ​កូវីដ​អូមី​ក្រុង។

លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានថ្លែង​ក្នុងពិធី​បើក​យុទ្ធនាការជាតិទប់ស្កាត់ការចម្លងមេរោគបំប្លែងថ្មីអូមីក្រុង នៅថ្ងៃទី ២២ ខែមីនានេះ​ ឱ្យដឹងថា តាម​លក្ខណៈបច្ចេកទេមាន ២០ ភាគរយ នៃអ្នកជាសះ​ស្បើយពីជំងឺបំប្លែងថ្មីអូមីក្រុង​ នៅសល់កាកសំណល់ផលវិបាកដែលបណ្ដាល មកពីវិរុសកូវីដ១៩ បំប្លែងថ្មីនេះ ធ្វើទុក្ខនៅ​ក្នុងសរីរាង្គ​កាយ។

លោកស្រីបញ្ជាក់ថា ៖ “ដូច្នេះប្រសិនបើអ្នកជាហើយ មិនបានការពារត្រឹមត្រូវ បែរជាឆ្លង​ឡើងវិញ​ទៀត ហើយក្រោយ​ពីជា​សះស្បើយ​ទៅ យើងអត់ដឹងថា វាទៅប៉ះពាល់ដល់​សរីរាង្គ​ណាទៀត​របស់​មនុស្ស ដូចជាសួត ថ្លើម បេះដូង តម្រង​នោម”។

លោកស្រីវេជ្ជបណ្ឌិត លី អាយលែន (Li Ailan) តំណាងអង្គការសុខភាពពិភពលោកប្រចាំកម្ពុជា មានប្រសាសន៍ថា ការឆ្លងរាត្បាតជាសកលនេះ មិនទាន់ចប់នៅឡើយទេ កំពុងតែបន្តរីករាល​ដាលនៅឡើយនៅទូទាំងសកលលោក ហើយអូមីក្រុងជាមេរោគដែលបង្កឱ្យមានជំងឺកូវីដ១៩ ច្រើនជាងគេ នៅប្រទេសមួយចំនួន មាន​មេ​រោគ​ Delta ប៉ុន្តែស្ថិតនៅក្រុងកម្រិតតូច។

ផ្អែកលើទិន្ន័យរបស់អង្គការសុខភាពពិភពលោក ក្នុងរយៈពេល ១ ខែចុងក្រោយនេះ បង្ហាញថា ចំនួនសំណាកជាង ៤០ ម៉ឺន មាន ៩៩.៩ ភាគរយ គឺជាមេរោគអូមីក្រុង ហើយមានតែ ០.១ ភាគរយ​ទេ​ ដែលជា Delta៕

អត្ថបទ៖ ឡេង ដេត