គណបក្សហ៊្វុនស៊ិនប៉ិចសម្រេច ៣ចំណុច ក្រោយកិច្ចប្រជុំគណៈកម្មាធិការនាយក នារសៀលនេះ

គណៈកម្មាធិការ នាយកគណបក្សហ៊្វុនស៊ិនប៉ិច នៅរសៀលថ្ងៃទី ២៥ ខែមីនា ឆ្នាំ ២០២២ បានបើកកិច្ចប្រជុំពិសេសមួយ ដើម្បីពិនិត្យ និងពិភាក្សា កែសម្រួលបទបញ្ជាផ្ទៃក្នុងរបស់គណបក្ស និងគាំទ្រលើគោលនយោបាយអាទិភាព សម្រាប់ចូលរួមការបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី ៥នេះ។

លោក ញឿន រ៉ាដែន អ្នកនាំពាក្យ នៃគណបក្សហ៊្វុនស៊ិនប៉ិច បានឲ្យដឹងថា កិច្ចប្រជុំនេះធ្វើឡើងក្រោមអធិបតីភាព របស់ព្រះអង្គម្ចាស់ នរោត្តម ចក្រាវុធ ព្រះប្រធានគណបក្សហ៊្វុនស៊ិនប៉ិច និងព្រះអង្គម្ចាស់ក្សត្រី ព្រមទាំងថ្នាក់ដឹកនាំ និងសមាជិក-សមាជិកាចំនួន ៥៤រូប។

បើតាមលោក ញឿន រ៉ាដែន កិច្ចប្រជុំបានសម្រេចគាំទ្រទាំងស្រុង លើចំណុចចំនួន ៣ ខាងក្រោម៖

ទី១. លើការកែសម្រួលបទបញ្ជាផ្ទៃក្នុងគណបក្ស សមស្របតាមការដឹកនាំ របស់ព្រះអង្គម្ចាស់ នរោត្តម ចក្រាវុធ ព្រះប្រធានគណបក្ស។

ទី២. គាំទ្រលើសេចក្តីព្រាង គោលនយោបាយអាទិភាព ៩ ចំណុច សម្រាប់ចូលរួមបោះឆ្នោត ក្រុមប្រឹក្សាឃុំ-សង្កាត់ ដែលត្រូវនឹងផ្សព្វផ្សាយ នៅពេលខាងមុខនេះ។

ទី៣. ឯកភាពផ្ទៃក្នុង រួមរួបគ្នា សាមគ្គីគ្នា ដើម្បីគណបក្សទទួលបានជោគជ័យ និងទទួលបានអាសនៈ សារជាថ្មី៕

អត្ថបទ៖ ឃួន សុភ័ក្រ