លោក ស៊ុន ចាន់ថុល៖ កំពង់ផែទេសចរណ៍​ខេត្តកំពត សម្រេចសាងសង់​បាន ៩៣% គ្រោងបញ្ចប់នៅចុងខែមិថុនា

លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានឲ្យដឹងថា កំពង់ផែទេសចរណ៍ខេត្តកំពត សម្រេចការសាងសង់បានចំនួន ៩៣%ហើយ និងគ្រោងបញ្ចប់ការសាងសង់ នៅថ្ងៃទី ៣០ ខែ មិថុនា ឆ្នាំ ២០២២ខាងមុខ។ លោកថ្លែងបែបនេះ នៅក្នុងដំណើរចុះពិនិត្យវឌ្ឍនភាពការងារសាងសង់កំពង់ផែទេសចរណ៍ខេត្តកំពត នៅថ្ងៃទី ២៩ ខែមីនា។

កំពង់ផែទេសចរណ៍អន្តរជាតិនេះ បានចាប់ផ្តើមបើកការដ្ឋានសាងសង់ កាលពីថ្ងៃទី៨ ខែសីហា ឆ្នាំ២០១៨ ។ កំពង់ផែនេះ មានជម្រៅ ៤,៥ ម៉ែត្រ សាងសង់ឡើងក្រោមហិរញ្ញប្បទានប្រមាណ ៩លាន ២សែនលានដុល្លារ ថវិការបស់ធនាគារអភិវឌ្ឍន៍អាស៊ី ដែលមានទីតាំងលើដីទំហំ ៤ ហិកតា នៅស្រុកទឹកឈូ។

ក្រោយបញ្ចប់ការសាងសង់ កំពង់ផែនេះនឹងអាចឱ្យនាវាដឹកអ្នកដំណើរចាប់ពី ៣០០ ទៅ ៤០០ នាក់ ចូលចតបាន។ លើសពីនេះ កំពង់ផែទេសចរណ៍អន្តរជាតិនេះ គឺជាច្រកចេញចូលនាវាទេសចរណ៍ ភ្ជាប់ពីប្រទេសថៃ និងវៀតណាម ចូលមកខេត្តកំពត ដែលជាខេត្តជាប់មាត់សមុទ្ររបស់កម្ពុជា។

សូមបញ្ជាក់ថា គម្រោងនេះត្រូវបានពន្យារពេលជាច្រើនដងមកហើយ ដោយសារតែវិបត្តិកូវីដ១៩។ លោករដ្ឋមន្រ្តី ស៊ុន ចាន់ថុល សង្កត់ធ្ងន់ថា កំពង់ផែននេះ ក៏ជាផ្នែកមួយទាក់ទាញភ្ញៀវទេសចរ ឲ្យចូលមកកម្សាន្តនៅខេត្តកំពត និងកែបផងដែរ៕

អត្ថបទ៖ ទួន សុផល