(ដំណឹងបន្ទាន់) ៖ លោក អ៊ុក រី អភិបាលបណ្តោះអាសន្នក្រុមហ៊ុន Opennet ធ្វើការប្រជុំបន្ទាន់ពាក់ព័ន្ធដំណើរការក្រុមហ៊ុន Opennet ជាមួយភាគីក្រុមហ៊ុន

លោក អ៊ុក រី អភិបាលបាលបណ្តោះអាសន្ន នៃកូនបំណុលក្រុមហ៊ុន King Technologies Co.,Ltd (Opennet) ដែលតែងតាំងឡើងដោយតុលាការ នៅថ្ងៃទី៣ ខែមេសា ឆ្នាំ២០២២នេះ បានចេញលិខិតកោះប្រជុំបន្ទាន់ដោយឱ្យនាយកប្រតិបត្តិ ប្រធានសាខា និងប្រធានគ្រប់ផ្នែកទាំងអស់របស់ក្រុមហ៊ុន King Technologies Co., Ltd (Opennet) ពាក់ព័ន្ធនិងដំណើរការអាជីវកម្មរបស់កូនបំណុលក្រុមហ៊ុន King Technologies Co., Ltd (Opennet) បន្ទាប់ពីតុលាការចេញដីកាសម្រេចបើកសំណុំរឿងក្ស័យធនកាលពីថ្ងៃទី២៨ ខែមីនា ឆ្នាំ២០២២ ថ្មីៗនេះ។

ក្នុងសេចក្តីជូនដំណឹងចុះថ្ងៃទី៣ មេសានេះ លោក អ៊ុក រី បានបញ្ជាក់ថា “លោក លោកស្រី ត្រូវបានកោះអញ្ជើញប្រជុំបន្ទាន់ ជាមួយអភិបាលបណ្តោះអាសន្ននៃកូនបំណុលក្រុមហ៊ុន King Technologies Co., Ltd (Opennet) នៅទីស្នាក់ការកណ្តាលនៃក្រុមហ៊ុន King Technologies Co., Ltd (Opennet) ស្ថិតនៅផ្ទះលេខ៤៩ ផ្លូវ៣០៦ សង្កាត់បឹងកេងកង១ ខណ្ឌចំការមន រាជធានីភ្នំពេញ នៅថ្ងៃចន្ទ ៣កើត ខែចេត្រ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី៤ ខែមេសា ឆ្នាំ២០២២ វេលាម៉ោង ០៩ព្រឹក ជាកំហិត ដើម្បីផ្តល់ព័ត៌មានពាក់ព័ន្ធនិងដំណើរការអាជីវកម្មរបស់កូនបំណុលក្រុមហ៊ុន King Technologies Co., Ltd (Opennet)។

ជាមួយគ្នានេះ លោក អ៊ុក រី ក៏បានណែនាំឱ្យ នាយកប្រតិបត្តិ ប្រធានសាខា និងប្រធានគ្រប់ផ្នែកទាំងអស់របស់ក្រុមហ៊ុន King Technologies Co., Ltd (Opennet) ធ្វើការការចាត់ចែងទ្រព្យសម្បត្តិរបស់ក្រុមហ៊ុន King Technologies Co., Ltd (Opennet) ដោយគ្មានការអនុញ្ញាតពីអភិបាលបណ្តោះអាសន្ន និងការបង្វែរទ្រព្យសម្បត្តិរបស់ក្រុមហ៊ុន King Technologies Co., Ltd (Opennet) ជាអាទិ៍ សាច់ប្រាក់, សម្ភារៈផ្សេងៗ ចេញពីក្រុមហ៊ុន King Technologies Co., Ltd (Opennet)ឡើយ ហើយត្រូវឱ្យបុគ្គលិកដែលស្ថិតនៅក្រោមឱវាទទាំងអស់របស់ខ្លួន បន្តបំពេញការងារតាមតួនាទីភារកិច្ចជាធម្មតា។

បើតាមលោក អ៊ុក រី “ករណីមិនសហការតាមការជូនដំណឹងនេះ លោក លោកស្រី ត្រូវទទួលខុសត្រូវចំពោះការខូចខាត ដែលកើតឡើងដោយសារការមិនព្រមសហការជាមួយអភិបាលបណ្តោះអាសន្ន (មន្រ្តីតុលាការ) អនុលោមតាម ច្បាប់ជាធរមាន”៕