អាមេរិក ថា យោធារុស្ស៊ីមិនលើកទូរសព្ទ ពេលខ្លួនទាក់ទងទៅ 

រដ្ឋមន្ត្រីការពារជាតិអាមេរិក លោក Lloyd Austin បាននិយាយសារជាថ្មីនៅក្នុងសវនាការគណៈកម្មាធិការសេវាប្រដាប់អាវុធរបស់ព្រឹទ្ធសភាកាលពីថ្ងៃព្រហស្បតិ៍ទី០៧ខែមេសាថា មេដឹកនាំយោធាអាមេរិក មិនអាចទាក់ទងបានជាមួយសមភាគីនៅទីក្រុងមូស្គូទេ ចាប់តាំងប្រតិបត្តិការយោធារបស់រុស្ស៊ីក្នុងប្រទេសអ៊ុយក្រែន ចាប់ផ្តើម។

លោក Austin បានប្រាប់សមាជិកព្រឹទ្ធសភាថា “លោកឧត្តមសេនីយ៍ Mark Milley ប្រធានអគ្គសេនាធិការចម្រុះ និងខ្លួនខ្ញុំផ្ទាល់បានទាក់ទងទៅសមភាគី ក្នុងប្រទេសរុស្ស៊ី ជាញឹកញាប់ដើម្បីព្យាយាមធានាថា យើងអាចរក្សាកិច្ចសន្ទនាបាន។ លើកចុងក្រោយបំផុត គឺចាប់តាំងពីពាក់កណ្តាលខែកុម្ភៈមក”។

លោក​បាន​បន្ថែម​ថា​ “​វា​មិនមែន​ជោគជ័យធំ​ទេ ​ព្រោះ​ខាង​រុស្ស៊ី​មិន​បាន​ឆ្លើយតប​”។

ទោះនិយាយថា លោកខកចិត្តចំពោះរឿងនេះក៏ដោយ ប៉ុន្តែលោកបានបន្ថែមថា “វាមិនមែនមានន័យថា យើងនឹងឈប់ទាក់ទងពួកគេនោះទេ។ ខ្ញុំ​គិត​ថា យើង​ត្រូវ​តែ​មាន​សមត្ថភាព​និយាយ​ជាមួយ​ថ្នាក់​ដឹកនាំ”។

លោក Austin និយាយបែបនេះ នៅពេលត្រូវបានកោះហៅទៅព្រឹទ្ធសភា ដើម្បីឆ្លើយសំណួរអំពីកញ្ចប់ថវិកាឆ្នាំ២០២៣ ដែលមន្ទីរបញ្ចកោណស្នើសុំ និងជាចំនួនដ៏ធំបំផុតក្នុងប្រវត្តិសាស្ត្រអាមេរិក។

នៅក្នុងសន្និសីទសារព័ត៌មានថ្ងៃទី ៣០ ខែមីនា អ្នកនាំពាក្យមន្ទីរបញ្ចកោណលោក John Kirby បានសារភាពថា មិនមានការសន្ទនាជាមួយយោធារុស្ស៊ីទេ ប៉ុន្តែបានប្រកាសថា អាមេរិកមានឆន្ទៈក្នុងកិច្ចពិភាក្សាទាំងនោះ៕

ប្រែសម្រួល៖ Vann Vann

ប្រភព៖ RT

ចុចអាន៖ ប្រទេសមួយ បង្ខំចិត្តបោះឆ្នោតប្រឆាំងរុស្ស៊ីនៅ UN ព្រោះរងការគំរាមកំហែង ដាក់ទណ្ឌកម្ម