អ៊ុយក្រែន បង្ហាញចំនួនទាហាន រុស្ស៊ី កំពុងឈរជើងក្នុងប្រទេស

​លោក Oleksiy Arestovych ទីប្រឹក្សាប្រធានាធិបតីអ៊ុយក្រែនបានអះអាងថា បច្ចុប្បន្នទាហានរុស្ស៊ីប្រហែល ៩០,០០០ នាក់មានវត្តមាននៅក្នុងប្រទេសអ៊ុយក្រែន ។

ថ្លែងទៅកាន់អ្នកសារព័ត៌មាន លោក Arestovych បាននិយាយថា ទាហានរុស្ស៊ី ២២,០០០ នាក់ក៏កំពុងឈរជើងនៅព្រំដែនជាមួយអ៊ុយក្រែនផងដែរ ។

ទន្ទឹមនោះ ការបញ្ចេញតួរលេខនេះធ្វើឡើង បន្ទាប់ពីកងកម្លាំងរុស្ស៊ីវាយដណ្តើមយកបានទាំងស្រុងនូវទីក្រុងកំពង់ផែសមុទ្រខ្មៅដ៏សំខាន់ Mariupol ។

លោក Arestovych បញ្ជាក់ថា ពេលនេះមនុស្សជាង ៥ លាននាក់ក៏បានភៀសខ្លួនចេញពីប្រទេសអ៊ុយក្រែនផងដែរ ខណៈដែលប្រទេសរុស្ស៊ីបានចាប់ផ្តើមដំណាក់កាលទីពីរនៃ “ប្រតិបត្តិការយោធាពិសេស” របស់ខ្លួននៅក្នុងតំបន់ Donbas ភាគខាងកើតរបស់ប្រទេស ។

ចំណែកយោងតាមរដ្ឋមន្ត្រីការបរទេសលោក Sergey Lavrov បានឲ្យដឹងថា ប្រតិបត្តិការនៅភាគខាងកើតអ៊ុយក្រែនគឺសំដៅលើការរំដោះពេញលេញនៃសាធារណរដ្ឋ Donetsk និង Luhansk ដែលទីក្រុងម៉ូស្គូបានទទួលស្គាល់ថាជារដ្ឋឯករាជ្យ មុននឹងចាប់ផ្តើមសង្រ្គាមលើអ៊ុយក្រែននៅថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី វាយយកបានទីក្រុងកំពង់ផែសំខាន់ Mariupol ហើយ