កម្លាំងចម្រុះឆ្មក់បង្ក្រាបទីតាំងលក់សត្វព្រៃមួយកន្លែង ក្រោយសាលាខណ្ឌដង្កោ ដកហូតសាច់សត្វព្រៃមួយចំនួន

កម្លាំងអន្តរាគមន៍បង្ក្រាបសត្វព្រៃនៃរដ្ឋបាលព្រៃឈើរួមសហការជាមួយខណ្ឌរដ្ឋបាលរាជធានីភ្នំពេញ និងកម្លាំងកងរាជអាវុធហត្ថលើ​ផ្ទៃប្រទេស នៅវេលាម៉ោង១១ព្រឹក ថ្ងៃទី២២ ខែមេសា ឆ្នាំ២០២២ នេះ បានចុះឆែកឆេរ និងបង្ក្រាបទីតាំងលក់សាច់សត្វព្រៃមួយកន្លែងស្ថិតនៅភូមិថ្មី  សង្កាត់ដង្កោ ខណ្ឌដង្កោ រាជធានីភ្នំពេញ។

តាមប្រភពព័ត៌មានបានអោយដឹងថា មុនឈានដល់ការបង្ក្រាប គឺកម្លាំងសមត្ថកិច្ចចម្រុះបានធ្វើ​ការស្រាវជ្រាវរហូតកំណត់ច្បាស់ថា ទីតាំងនេះ​ពិតជាមានលួចលក់សត្វព្រៃប្រាកដមែន ទើបកម្លាំងចុះត្រួតពិនិត្យឆែកឆេររកឃើញសាច់ជ្រូកព្រៃស្រល់ចំនួន៥,៥០គីឡូក្រាម សាច់សត្វឈ្លូស  ១០គីឡូក្រាម។

ក្រោមពិនិត្យឃើញជាក់ស្តែងសមត្ថកិច្ចបានដកហូតសាច់សត្វព្រៃទាំងនោះ និងបានណែនាំទៅលើ​កម្ចាស់ទីតាំងរួមទាំងធ្វើការពិន័យទៅតាមផ្លូវច្បាប់៕

អត្ថបទ៖ លីហេង