លោក ជា ចាន់តូ ចុះត្រួតពិនិត្យផ្ទាល់ដំណើរការប្រឡងរបស់មន្ត្រីធនាគារតាមប្រព័ន្ធអនឡាញ

លោក ជា ចាន់តូ ទេសាភិបាលធនាគារជាតិនៃកម្ពុជា បានអញ្ជើញចុះត្រួតពិនិត្យផ្ទាល់ដំណើរការ ប្រឡងរបស់មន្ត្រីធនាគារតាមប្រព័ន្ធអនឡាញ សម្រាប់វគ្គ NBC-FSIConnect លើកទី៤២ និងលើកទី៤៣ ដើម្បីធានាពីគុណភាពនិងប្រសិទ្ធភាពនៅក្នុងការប្រឡង។

ថ្លែងក្នុងឱកាសចុះត្រួតពិនិត្យផ្ទាល់ដំណើរការប្រឡងកាលពីថ្ងៃទី២១ ខែមេសា លោក ជា ចាន់តូ បានមានប្រសាសន៍ថា វគ្គ Financial Stability Institute របស់ធនាគារជាតិ នៃកម្ពុជា (NBC-FSI Connect) ជាវគ្គបណ្តុះបណ្តាលតាមប្រព័ន្ធ Online ផ្នែកត្រួតពិនិត្យធនាគារដែលត្រូវបានបង្កើតឡើងក្រោមការផ្តួចផ្តើមរបស់លោកផ្ទាល់ដើម្បីកសាងសមត្ថភាពធនធានមនុស្សនៅ​ធនាគារជាតិនៃកម្ពុជា បន្ថែមលើកម្មវិធីបណ្តុះបណ្តាលផ្ទៃក្នុងដែលមានស្រាប់ជាពិសេសដើម្បីឯកទេសកម្មខាងត្រួតពិនិត្យធនាគារ និងឆ្លើយតបទៅតាម ការប្រែប្រួលនៃនិម្មាបនកម្មហិរញ្ញវត្ថុ និងនិយាមអន្តរជាតិអំពីការត្រួតពិនិត្យធនាគារ ។

លោកបានបន្តថា វគ្គ NBC-FSI Connect នេះតម្រូវឱ្យសិក្ខាកាមសិក្សាតាមប្រព័ន្ធ Online និងត្រូវបានបែងចែកជាបី កម្រិតគឺកម្រិតបឋម កម្រិតមធ្យម និងកម្រិតខ្ពស់សម្រាប់រយៈពេលសិក្សាប្រមាណជាង៣ឆ្នាំហើយដើម្បីធានាគុណភាពសិក្សាគណៈកម្មការគ្រប់គ្រងវគ្គ មួយត្រូវបានបង្កើតឡើងសម្រាប់គ្រប់គ្រងការសិក្សារបស់សិក្ខាកាមវគ្គនេះដែលមានការគាំទ្រដោយផ្ទាល់របស់ថ្នាក់ដឹកនាំ ។

លោកបានបន្តទៀតថា ជាក់ស្តែងនៅថ្ងៃទី២១ ខែមេសា ឆ្នាំ២០២២មានការប្រឡងចំនួន២លើក គឺលើកទី៤២ មានសិក្ខាកាមចំនួន៥៨រូប និងលើកទី​៤៣ មានសិក្ខាកាមចំនួន៥៨រូប ដែលបានចូលរួមប្រឡងវគ្គ NBC-FSIConnect ទាំង២លើកមានសិក្ខាកាមសរុបចំនួន ១១៦ រូបក្រោមការត្រួតពិនិត្យដោយផ្ទាល់របស់ឯកឧត្តមទេសាភិបាល ។

លោកបានបញ្ជាក់ថា ដោយឡែកនៅថ្ងៃដដែលក៏មានការប្រឡងតេស្តសម្រាប់ជ្រើសរើសមន្ត្រីបុគ្គលិក ឲ្យចូលរៀនក្នុងកម្មវិធីបណ្តុះបណ្តាល​ NBC-FSI Connectជំនាន់ទី ៦ ដែលមានបេក្ខជនដាក់ពាក្យសុំការការចូលរួមប្រឡងជ្រើសរើសសរុប១៣៩រូប ដែលមានមន្ត្រី បុគ្គលិកទី​ស្នាក់ការកណ្តាល និងសាខារាជធានីខេត្តផងដែរ៕

អត្ថបទ៖ សំអឿន