កម្ពុជា និងអង្គការ IOM ​ប្តេជ្ញារួមគ្នាផ្តល់កិច្ចគាំពារដល់ពលករទេសន្តរប្រវេសន៍ធ្វើការ​នៅក្រៅ​ប្រទេស

ក្រសួងការងារ និងបណ្តុះបណ្តាលវិជ្ជាជីវៈ និងអង្គការទេសន្តរប្រវេសន៍អន្តរជាតិ(IOM)បាន​ប្តេជ្ញា​រួម​គ្នាបន្តកិច្ចសហប្រតិបត្តិការក្នុងការជួយគាំទ្រនិងផ្តល់កិច្ចគាំពារដល់ពលករ​ទេសន្តរប្រវេសន៍​កម្ពុជានៅក្រៅប្រទេស។

ការប្តេជ្ញានេះបានធ្វើឡើងនៅក្នុងជំនួបពិភាក្សារវាងលោកស្រី Nenette Motus​នាយក​អង្គការ​ទេសន្តរ​ប្រវេសន៍អន្តរជាតិ (IOM) ប្រចាំតំបន់អាស៊ី និងប៉ាស៊ីហ្វិកនិងលោកស្រី ​KRISTIN PARCO ប្រធានបេសកកម្មអង្គការ IOMប្រចាំនៅកម្ពុជា នៅព្រឹកថ្ងៃទី២៥ ខែមេសា ឆ្នាំ២០២២ នៅទីស្តីការក្រសួងការងារដើម្បីសុំការឯកភាពគាំទ្រពីលើការអនុវត្ត គម្រោងPROMISE ក្នុងជំហានទី២បន្តទៀត ចាប់ពីខែកញ្ញា ឆ្នាំ២០២១ ដល់ ខែសីហា ឆ្នាំ២០២៥។

លោកបណ្ឌិត អ៊ិត សំហេង បានវាយតម្លៃខ្ពស់ ចំពោះអង្គការ IOM​ដែលបានដើរតួនាទី​យ៉ាង​សំខាន់ លើការផ្សព្វផ្សាយបញ្ហាទេសន្តរប្រវេសន៍ប្រកបដោយស្ថិរភាព ជាដៃគូមិនអាចខ្វះ​បាន​នៅក្នុងតំបន់អាស៊ីប៉ាស៊ីហ្វិក និងកម្ពុជា។​ ជាពិសេស ស្ថិតក្នុងដំណាក់កាលកូវីដ-១៩ ដែលពលករមិនអាចធ្វើការឆ្លងកាត់បានត្រូវជាប់​គាំងនៅតាមបណ្តាប្រទេសនីមួយៗ ត្រូវបាន អង្គការ IOMបានធ្វើការដោះស្រាយបញ្ហានេះ ប្រកបដោយប្រសិទ្ធភាព។

ក្នុងឱកាសនោះ លោកស្រី Nenette Motus បានគូសបញ្ជាក់ពី គម្រោងPROMISE ដែលជាកម្មវិធី​ថ្នាក់តំបន់អនុវត្តក្រោមការដឹកនាំរបស់អង្គការទេសន្តរប្រវេសន៍អន្តរជាតិ (IOM)ដោយ​ទទួល​បានការគាំទ្រពីទីភ្នាក់ងារស្វីសសម្រាប់ការអភិវឌ្ឍនិងកិច្ចសហប្រតិបត្តិការ (SDC)។ គម្រោងនេះមានរយៈពេល ៨ឆ្នាំចែកជាពីរដំណាក់កាលដំណាក់កាលទី១ ៖ ចាប់ពីខែកញ្ញា ឆ្នាំ២០១៧ ដល់ខែសីហា ឆ្នាំ២០២១, ដំណាក់កាលទី២ ៖ ចាប់ពីខែកញ្ញា ឆ្នាំ២០២១ ដល់ខែសីហា ឆ្នាំ២០២៥នៅចន្លោះឆ្នាំ ១៩៩៨-២០០២ លោកស្រីធ្លាប់ជាប្រធានអង្គការIOM ប្រចាំ​ប្រទេសកម្ពុជាហើយលោកស្រីពិតជាមានក្តីរីករាយជាខ្លាំងដែលបានបំពេញទស្សនកិច្ចនៅកម្ពុជាសារជាថ្មី។

លោកស្រី Nenette Motusបានមើលឃើញថា កម្ពុជាមានការរីកចម្រើនប្លែកពីមុនច្រើនជាពិសេស​ក្រសួងការងារ និងបណ្តុះបណ្តាលវិជ្ជាជីវៈ​ក៏ឃើញថាមានវឌ្ឍនភាពច្រើនផង​ដែរ​ ខណៈកម្ពុជា​ត្រូវធ្វើជាម្ចាស់ផ្ទះ ក្នុងកិច្ចប្រជុំអាស៊ានសម្រាប់ឆ្នាំនេះ អង្គការ IOM ចង់ផ្តល់ការគាំទ្រលើបញ្ហាបច្ចេកទេស និងឯកសារមួយចំនួន ក្នុងករណីមានរបៀបវារៈ ពាក់ព័ន្ធទៅនឹងកិច្ចប្រជុំស្តីពីពលករ​ទេសន្តរប្រវេសន៍នេះនិងផ្តល់ជំនួយបច្ចេកទេសលើគោលនយោបាយទេសរន្តប្រវេសន៍នៅកម្ពុជាផងដែរ។

ឆ្លើយតបនឹងការជួយរបស់ IOM លោករដ្ឋមន្ត្រី បានបញ្ជាក់ថា​«ចំពោះកិច្ចប្រជុំអាស៊ានដែល​កម្ពុជា​ត្រូវ​ធ្វើជាម្ចាស់ផ្ទះនៅក្នុងឆ្នាំនេះពិតជាមិនអាចរំលងពីប្រធានបទ ព័ន្ធពាក់ទៅនឹងពលករ​ទេសន្តរប្រវេសន៍នេះឡើយដូច្នេះ បានខាងអង្គការ​IOM ផ្តល់ការគាំទ្រជួយលើបញ្ហាបច្ចេកទេស និងឯកសារផងដែរនោះ វាផ្តល់នូវធាតុចូលកាន់តែច្រើនបន្ថែមទៀតសម្រាប់ធ្វើការដោះ​ស្រាយ​នូវចំណុចប្រឈមមួយចំនួនដែលត្រូវធ្វើការរួមគ្នាដោះស្រាយ »។

សម្រាប់គោលនយោបាយទេសន្តរប្រវេសន៍ ដែលក្រសួងការងារ និងបណ្តុះបណ្តាលវិជ្ជាជីវៈ បានធ្វើការជាមួយ អង្គការ ILO លោករដ្ឋមន្ត្រីចង់ឃើញគោលនយោបាយមួយនេះ ក្លាយជា​គោលនយោបាយជាតិដោយមានការអនុម័តគាំទ្រពីរាជរដ្ឋាភិបាលកម្ពុជាហើយកម្ពុជា​ក៏ត្រូវការ​ជួយជ្រោមជ្រែងបន្ថែមពីខាង IOM និងដៃគូពាក់ព័ន្ធមួយចំនួនទៀត ដើម្បីឲ្យគោលនយោបាយ​នេះ កាន់តែរឹងមាំ និងធានាបាននូវសុវត្ថិភាពសម្រាប់ពលករទេសរន្តប្រវេសន៍។

លោកបណ្ឌិត អ៊ិត សំហេង បានឯកភាពគាំទ្រ និងបន្តកិច្ចសហប្រតិបត្តិការជាមួយអង្គការ IOM ក្នុងការអនុវត្តគម្រោងPROMISE សម្រាប់ជំហានទី២ បន្តទៀត។ ជាមួយគ្នានោះ លោករដ្ឋមន្ត្រី បានស្នើដល់អង្គការ IOMបង្កើនកិច្ចសហប្រតិបត្តិការជាមួយក្រសួង​លើគម្រោងសម្រាប់​ផ្តល់​ជំនួយទាក់ទងនឹងការទប់ស្កាត់ការរីករាលដាលជំងឺ​កូវីដ-១៩សម្រាប់ពលករទេសន្តរប្រវេសន៍ និងជួយគាំទ្រក្នុងការអនុវត្តន៍លើលទ្ធផលសន្និសីទថ្នាក់រដ្ឋមន្ត្រី ការងារលើកទី៣ CLMVT កាលពីថ្ងៃទី១៧ ខែកញ្ញា ឆ្នាំ២០១៩ នៅខេត្តសៀមរាប ទាក់ទងទៅនឹង​ផែនទីបង្ហាញផ្លូវ​ទីក្រុង​សៀមរាប ដើម្បីឆ្ពោះទៅកាន់ការចេញសេចក្តីថ្លែងការណ៍របស់រដ្ឋមន្ត្រីការងារស្តីពីចល័ត​ភាព​របបសន្តិសុខសង្គមសម្រាប់ពលករទេសន្តរប្រវេសន៍នៃប្រទេស CLMVT​និងកសាងសមត្ថភាពការលើកកម្ពស់ការយល់ដឹងដល់សមាគមទីភ្នាក់ងារជ្រើសរើសពលករ និងទីភ្នាក់ងារជ្រើសរើស​ឯក​ជន ស្តីពីប្រព័ន្ធអន្តរជាតិនៃការជ្រើសរើសពលករដោយសុចរិត(IRIS) ។

នៅក្នុងឱកាសនោះដែរភាគីទាំងពីរបានពិភាក្សាផងដែរ ទៅលើកិច្ចប្រជុំ នៃតំបន់មេគង្គ ស្តីពី​ពលករទេសន្តរប្រវេសន៍​ដោយសុវត្ថិភាពដែលកម្ពុជាជាសហប្រធាននៃកិច្ចប្រជុំនេះ ដែលនឹង​ត្រូវរៀបចំធ្វើឡើងនាខែឧសភា ឆ្នាំ២០២២ ខាងមុខនេះ​ក្រោមការជួយឧបត្ថម្ភពីធនាគារ​អភិវឌ្ឍន៍អាស៊ី៕

អត្ថបទ៖ សំអឿន