ព័ត៌មានអន្ដរជាតិ

លោក ពូទីន ចោទប្រទេសលោកខាងលិចជា«ភេរវករ» រដ្ឋអាជ្ញាត្រូវឆ្លើយតបបន្ទាន់

បានផុស

៣ years មុន

នៅ

ថ្ងៃអង្គារ ២៦ មេសា ២០២២

ដោយ

នៅថ្ងៃចន្ទ ទី២៥ ខែមេសា លោកប្រធានាធិបតីរុស្ស៊ី វ្លាឌីមៀរ ពូទីន បានចោទប្រកាន់ប្រទេសលោកខាងលិចពីបទព្យាយាមបំផ្លាញរុស្ស៊ី ដោយបានស្នើដល់រដ្ឋអាជ្ញាប្រកាន់យកខ្សែបន្ទាត់តឹងរ៉ឹងជាមួយអ្វីដែលលោកបានចោទប្រកាន់ថាជាផែនការបង្កឡើងដោយចារកម្មបរទេសដើម្បីបំបែកប្រទេស និងបង្ខូចកេរ្តិ៍ឈ្មោះកងកម្លាំងប្រដាប់អាវុធរបស់ខ្លួន។

ថ្លែងទៅកាន់រដ្ឋអាជ្ញាកំពូលរបស់រុស្ស៊ី លោក ពូទីន បានចោទប្រកាន់ប្រទេសលោកខាងលិចជាអ្នកញុះញង់អ៊ុយក្រែនឲ្យរៀបផែនការវាយប្រហារលើអ្នកកាសែតរុស្ស៊ី ប៉ុន្តែការចោទប្រកាន់ត្រូវបានរដ្ឋាភិបាលទីក្រុងកៀវបដិសេធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន មានប្រសាសន៍ថា អ្នកស្នងតំណែងសំខាន់ពីសម័យកាលសូវៀត KGB គឺសេវាសន្តិសុខសហព័ន្ធ (FSB) បានរារាំងការប៉ុនប៉ងធ្វើឃាតដោយក្រុមភេរវកម្មមួយលើអ្នកកាសែតទូរទស្សន៍រុស្ស៊ី លោក Vladimir Solovyev។

«ពួកគេជាភេរវករ ដោយត្រៀមធ្វើឃាតលើអ្នកកាសែតរបស់យើង»។ លោក ពូទីន មានប្រសាសន៍សំដៅលើប្រទេសលោកខាងលិច។

លោកប្រធានាធិបតី ពូទីន ដែលជាអតីតចារកម្ម KGB ម្នាក់ដែលបានគ្រប់គ្រងប្រទេសរុស្ស៊ីជាមេដឹកនាំដ៏សំខាន់តាំងពីឆ្នាំ១៩៩៩ មិនបានផ្តល់ភស្តុតាងភ្លាមៗទេដើម្បីគាំទ្រដល់ការអះអាងរបស់លោក ហើយទីភ្នាក់ងារសារព័ត៌មាន Reuters ក៏មិនអាចទាក់ទងដើម្បីបំភ្លឺជុំវិញការចោទប្រកាន់ដែរ។

ប្រធាន FSB លោក Alexander Bortnikov បាននិយាយថា ជនជាតិរុស្ស៊ីជាអ្នកជាតិនិយម៦នាក់បានរៀបចំផែនការសម្លាប់លោក Solovyev ដែលជាអ្នកកាសែតទូរទស្សន៍ និងវិទ្យុដ៏ល្បីល្បាញរបស់រុស្ស៊ី តាមការបញ្ជារបស់សេវាសន្តិសុខរដ្ឋរបស់ប្រទេសអ៊ុយក្រែន (SBU)។

យ៉ាងណា SBU បានបដិសេធចំពោះការចោទប្រកាន់នោះ។ អង្គភាពនេះបាននិយាយថា វាជាការរវើរវាយដែលប្រឌិតឡើយទីក្រុងមូស្គូ។ SBU គ្មានផែនការធ្វើឃាតលោក V Solovyev ទេ។

លោក ពូទីន មានប្រសាសន៍ថា ប្រទេសលោកខាងលិចបានដឹងថា អ៊ុយក្រែនមិនអាចយកឈ្នះរុស្ស៊ីនៅក្នុងសង្គ្រាម ដូច្នេះបានជារៀបចំផែនការផ្សេងៗដើម្បីបំផ្លាញរុស្ស៊ី។

«កិច្ចការផ្សេងទៀតបានកើតមានឡើងគឺដើម្បីបំបែកសង្គមរុស្ស៊ី និងបំផ្លាញរុស្ស៊ី»។ លោកពូទីនបានបញ្ជាក់ និងបន្ថែមថា «វាមិនដំណើរការទេ»។

លោកបន្តថា ស្ថាប័នព័ត៌មានបរទេស និងបណ្តាញទំនាក់ទំនងសង្គមត្រូវបានប្រើប្រាស់ដោយចារកម្មរបស់ប្រទេសលោកខាងលិចដើម្បីបញ្ឆោត បង្កហេតុ ប្រឆាំងនឹងកងកម្លាំងរុស្ស៊ី។

លោក ពូទីន បាននិយាយថា រដ្ឋអាជ្ញាគួរមានប្រតិកម្មយ៉ាងឆាប់រហ័សចំពោះព័ត៌មានក្លែងក្លាយ និងរបាយការណ៍ដែលបំផ្លាញសណ្តាប់ធ្នាប់ ប៉ុន្តែលោកមិនបានផ្តល់ឧទាហរណ៍ជាក់លាក់ណាមួយឡើយ។

«ជារឿយៗពួកគេត្រូវបានរៀបចំជាចម្បងពីបរទេសដែលត្រូវបានរៀបចំតាមរបៀបផ្សេងៗគ្នា – ទាំងព័ត៌មានមកពីទីនោះ ឬលុយ»។ លោកពូទីនបានបន្ថែម និងប្រាប់ថា រដ្ឋអាជ្ញាគួរតែប្រយុទ្ធប្រឆាំងនឹងភាពជ្រុលនិយម កាន់តែសកម្ម»៕

ប្រែសម្រួល៖ វីរបុត្រ
ប្រភព៖ Reuters

Related Topics: