ជំទាវទីមួយ អាមេរិក នឹងធ្វើដំណើរទៅកាន់ប្រទេសណាតូចំនួន ២ ដើម្បីគាំទ្រជនភៀសខ្លួន អ៊ុយក្រែន

សេតវិមានបានរាយការណ៍ថា ជំទាវទីមួយរបស់សហរដ្ឋអាមេរិកគឺលោកស្រី Jill Biden នឹងទៅបំពេញទស្សនកិច្ចនៅប្រទេសរូម៉ានី និងស្លូវ៉ាគីក្នុងសប្តាហ៍នេះ ដើម្បីបង្ហាញការគាំទ្រដល់ជនភៀសខ្លួនអ៊ុយក្រែន ជួបជាមួយបុគ្គលិកយោធាសហរដ្ឋអាមេរិកដែលត្រូវបានដាក់ពង្រាយនៅក្រៅប្រទេស និងរៀបចំកិច្ចប្រជុំផ្លូវការ ។

CNN បានរាយការណ៍ថា ជំទាវទីមួយនឹងចាកចេញទៅកាន់ប្រទេសរូម៉ានីនៅថ្ងៃទី ៥ ខែឧសភា ដើម្បីបំពេញទស្សនកិច្ចទៅកាន់មូលដ្ឋានទ័ពអាកាស Mihail Kogalniceanu បន្ទាប់មកទៅកាន់ទីក្រុង Bucharest នៅថ្ងៃទី ៧ ខែឧសភា ដើម្បីជួបជាមួយមន្ត្រីរដ្ឋាភិបាលរបស់ប្រទេស និងបុគ្គលិកមនុស្សធម៌របស់រ៉ូម៉ានី ។

របាយការណ៍បានបន្ថែមថា ក្រោយមកលោកស្រី Jill Biden នឹងធ្វើដំណើរទៅទីក្រុង Bratislava នៅថ្ងៃទី ៧ ខែឧសភា ដើម្បីជួបជាមួយបុគ្គលិកស្ថានទូតអាមេរិក មុនពេលចាកចេញទៅកាន់ទីក្រុង Kosice និង Vysne Nemecke នៅភាគខាងកើតរបស់ប្រទេសស្លូវ៉ាគី ពោលជាកន្លែងដែលជំទាវទីមួយនឹងបង្ហាញការគាំទ្រដល់ជនភៀសខ្លួនអ៊ុយក្រែន ។

យោងតាមរបាយការណ៍បានឲ្យដឹងទៀតថា ចំណែកនៅថ្ងៃទី ៩ ខែឧសភា ស្ត្រីទីមួយនឹងជួបជាមួយមន្ត្រីស្លូវ៉ាគី មុនពេលលោកស្រីត្រឡប់ទៅកាន់សហរដ្ឋអាមេរិកវិញ ។

គួរបញ្ជាក់ថា រហូតមកដល់ពេលនេះជនភៀសខ្លួនជាង ៥.៥ លាននាក់បានភៀសខ្លួនចេញពីប្រទេសអ៊ុយក្រែន ចាប់តាំងពីការចាប់ផ្តើមប្រតិបត្តិការយោធាពិសេសរបស់ប្រទេសរុស្ស៊ីកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ប្រទេសក្បែរខាងកម្ពុជាផ្ដល់ជំនួយមនុស្សធម៌ ៥០ ម៉ឺនដុល្លារដល់ អ៊ុយក្រែន