កម្ពុជា ត្រៀមរួចរាល់ ការសម្តែងសិល្បៈទទួលកីឡាសុីហ្គេមលើកទី៣២ ពីប្រទេសវៀតណាម

ក្នុងការត្រៀមក្នុងការទទួលធ្វើ​ជា​ម្ចាស់ផ្ទះ ព្រឹត្តិការណ៍កីឡាថ្នាក់តំបន់អាស៊ីអាគ្នេយ៍ ស៊ីហ្គេម លើកទី៣២ ឆ្នាំ២០២៣ខាងមុខ​នេះ ក៏កម្ពុជា ក៏បានត្រៀមរួចរាល់ នូវការសម្តែងសិល្បៈទទួលកីឡាសុីហ្គេម ពីប្រទេសវៀតណាម ក្នុងខែឧសភានេះផងដែរ។

ក្រសួងវប្បធម៌ និងវិចិត្រសិល្បៈ នៅរសៀលថ្ងៃទី៤ ខែឧសភា ឆ្នាំ២០២២នេះ បានឱ្យដឹងថា លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្ប: រួមជាមួយលោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាជាប្រធានគណៈកម្មការអូឡាំពិកកម្ពុជា បានអញ្ជើញពិនិត្យការសម្តែងសិល្ប:ដើម្បីត្រៀមទទួលទង់កីឡាសុីហ្គេម លើកទី៣២ ដែលកម្ពុជាទទួលធ្វើជាម្ចាស់ផ្ទះ នាឆ្នាំ២០២៣ ខាងមុខ។

ការសម្តែងសិល្ប:ដើម្បីទទួលកីឡាសុីហ្គេមនេះ រៀបចំធ្វើឡើងនៅសាលសន្និសីទចតុម្មុខ ក្រោមកិច្ចសហការសម្តែងដោយសិល្បក សិល្បការិនីនៃក្រសួងវប្បធម៌ និងវិចិត្រសិល្បៈ ជាមួយសហព័ន្ធកីឡាល្បុក្កតោកម្ពុជា។

គួរបញ្ជាក់ជូនថា កម្ពុជានឹងទទួលទង់កីឡាសុីហ្គេមបន្តពីប្រទេសវៀតណាម ដែលរៀបចំព្រឹត្តិការណ៍កីឡាសុីហ្គេមឆ្នាំ២០២២ នាខែឧសភា នៅទីក្រុងហាន់ណូយ៕