លោក គឹម បញ្ញា ៖ «យុទ្ធនាការហ៊ាននិយាយ​» ធ្វើឡើងដើម្បីលើកកម្ពស់សុវត្ថិភាពចរាចរណ៍ សម្រាប់កម្មករ-និយោជិត 

ប្រធានអង្គការមូលនិធិបង្ការរបួសអាស៊ី លោក គឹម បញ្ញា បានលើកឡើងថា «យុទ្ធនាការហ៊ាននិយាយ​» ធ្វើឡើងដើម្បីលើកកម្ពស់សុវត្ថិភាពចរាចរណ៍ សម្រាប់កម្មករ-និយោជិត ក្នុងវិស័យកាត់ដេរសម្លៀកបំពាក់ និងផលិតស្បែកជើងនៅកម្ពុជា។ លោកបញ្ជាក់ថា សព្វថ្ងៃនេះកម្មករ-និយោជិតក្នុងវិស័យកាត់ដេរសម្លៀកបំពាក់ និងផលិតស្បែកជើងច្រើនជាង ២០ភាគរយ រងគ្រោះថ្នាក់ចរាចរាណ៍តាមដងផ្លូវ។ លោក គឹម បញ្ញា បានលើកឡើងដូច្នេះ ក្នុងសន្និសីទសារព័ត៌មានប្រកាសដាក់ឲ្យអនុវត្តន៍ «យុទ្ធនាការហ៊ាននិយាយ» កាលពីថ្ងៃទី ៥ ខែឧសភា ឆ្នាំ២០២២កន្លងទៅនេះ។

ការដាក់ចេញយុទ្ធនាការ លើកកម្ពស់សុវត្ថិភាពចរាចរណ៍សម្រាប់កម្មករ-និយោជិត ស្របពេលបច្ចុប្បន្ននេះ ប្រទេសកម្ពុជាមានកម្មករ-និយោជិតប្រមាណ ៧០ម៉ឺននាក់ កំពុងមានភាពប្រថុយប្រថានដល់អាយុជីវិត ដើម្បីធ្វើដំណើរទៅនិងមកពីកន្លែងការងារនៅតាមដងផ្លូវ ដែលមានចរាចរណ៍កកស្ទះ និងបញ្ហាគ្រោះថ្នាក់ចរាចរណ៍ ជាដើម។ 

ក្នុងយុទ្ធនាការនេះ លោក គឹម បញ្ញា ប្រធានអង្គការមូលនិធិបង្ការរបួសអាស៊ី បានបង្ហាញការងារសកម្មភាពអាទិភាពចំនួន ៥ ចំណុច ដើម្បីធានាសុវត្ថិភាពចរាចរណ៍ ក្នុងការធ្វើដំណើររបស់កម្មករ-និយោជិត ដែលកំពុងជួបបញ្ហាប្រឈមនេះ។ ការងារសកម្មភាពអាទិភាពចំនួន ៥ ចំណុចនេះ រួមមាន ៖ ១. អ្នកបើកបរដឹកកម្មករ ត្រូវទទួលបានការបណ្ដុះបណ្ដាល ២. ជំរុញការបង្កើតគោលនយោបាយចរាចរណ៍ នៅតាមរោងចក្រសហគ្រាស ៣. ជួយកម្មករ-និយោជិត ឲ្យមានមធ្យោបាយធ្វើដំណើរសមរម្យ និងសុវត្ថិភាព ៤. ជួយបណ្ដុះបណ្ដាលកម្មករ ដែលបើកបរម៉ូតូឲ្យយល់ដឹង អំពីច្បាប់ចរាចរណ៍ផ្លូវគោក និងទី៥. ជួយកម្មករ-និយោជិត ទទួលបានមួកសុវត្ថិភាព ដែលមានគុណភាពខ្ពស់។ 

ក្រៅពីលើនេះ ប្រធានអង្គការមូលធិនិបង្ការបួសអាស៊ីរូបនេះ បានស្នើសុំដល់មន្រ្តីនគរបាលចរាចរណ៍ បន្តរឹតបន្ដឹងការអនុវត្តច្បាប់ចរាចរណ៍ផ្លូវគោក ឲ្យបានម៉ឺងម៉ាត់ចំពោះបទល្មើសចរាចរណ៍ទាំងឡាយ ដោយគ្មានការលើកលែងនោះឡើយ៕  

អត្ថបទ៖ ធឿន វ៉ាន់សុង