រូបសំណាក ៥ កន្លែង​​ មាន​​កម្ពស់​ចាប់ពី ២០ ម៉ែត្រ​នៅ​កម្ពុជា ​ទាក់ទាញ​ពលរដ្ឋ​គ្រប់ទិសទី

ចាប់តាំងពីការសាងសង់រូបសំណាកព្រះថោងតោងស្បៃនាងនាគមក ធ្វើ​ឲ្យ​មហាជនចាប់អារម្មណ៍ហើយ​ក្លាយជា​តំបន់ទេសចរដ៏​​ទាក់ទាញ​។ ក្រៅពី​រូប​សំណាក​ព្រះថោង​តោងស្បៃ​នាង​នាគ ក៏​មាន​​រូបសំណាកធំៗ​ខ្ពស់​​ៗ​ដ៏​គួរ​ឲ្យចាប់​អារម្មណ៍​មួយ​ចំនួនទៀត។

រូបលោកយាយម៉ៅ

សំណង់រូបសំណាកលោកយាយម៉ៅ​នៅ​ឧទ្យានជាតិ​ភ្នំ​បូកគោ​ បានចាប់ផ្តើមសាងសង់នៅថ្ងៃទី២៧ ខែកុម្ភៈ ឆ្នាំ២០១០ និងបញ្ចប់នៅថ្ងៃទី០៣ ខែឧសភា ឆ្នាំ២០១២។ រូបសំណាកនេះ សាងសង់ឡើងពីស៊ីម៉ង់ ដែលមានកម្ពស់ ២៩ ម៉ែត្រ និងទទឹង ៨ម៉ែត្រ។

រូបសំណាក​លោក​យាយម៉ៅ ត្រូវបានកំណត់ទីតាំងនៅលើកំពូលភ្នំ (កម្ពស់១០៧៥ម៉ែត្រ) ដែលអាចមើលឃើញឆ្នេរសមុទ្រទាំងមូល។

រូបសំណាកព្រះថោងតោងស្បៃនាងនាគ

រូបសំណាកព្រះថោងតោងស្បៃនាងនាគ បានក្លាយ​ជា​កន្លែង​ទាក់ទាញ​សម្រាប់​ភ្ញៀវ​ទេសចរទៅ​លេង​ខេត្តព្រះសីហនុ​។ មានទីតាំងស្ថិតនៅរង្វង់មូលមហាវិថីជំទាវម៉ៅ រូបសំណាកព្រះថោងតោងស្បៃនាងនាគ ទើប​ដាក់​សម្ពោធ​កាលពីពេល​​ថ្មីៗ​នេះ មានកម្ពស់ ២១ ម៉ែត្រ បល្ល័ង្កកម្ពស់ ៦,៤៣ ម៉ែត្រ សរុបកម្ពស់ ២៧,៤៣ ម៉ែត្រ ស្ថិត​នៅ​ទីប្រសព្វគ្នារវាងមហាវិថីជំទាវម៉ៅ និងមហាវិថីឆ្នេររាម ក្នុងក្រុងកំពង់សោម ខេត្តព្រះសីហនុ។

ព្រះពុទ្ធរូបប្រាសាទឯកភ្នំ

រូបព្រះពុទ្ធប្រាសាទឯកភ្នំ មានទីតាំងស្ថិតនៅភូមិគម ឃុំពាមឯក ស្រុកភ្នំឯក ខេត្តបាត់ដំបង ចម្ងាយ១៤គីឡូម៉ែត្រពីទីរួមខេត្តបាត់ដំបង។ រូបបដិមានេះ មានកម្ពស់ប្រមាណ ២៥ម៉ែត្រ សាងសង់ក្នុងឆ្នាំ២០០៣ ដោយព្រះចៅអធិការវត្តព្រមទាំងពុទ្ធបរិស័ទ ប៉ុន្តែ​មាន​បញ្ហា​ចម្រូងចម្រាស​មួយ​ចំនួន​​នៅ​មិន​ទាន់​បញ្ចប់​ការ​សាងសង់​នោះទេ។

ព្រះពុទ្ធបដិមាផ្ចាញ់មារ នៅលើភ្នំយ៉ាត

ព្រះពុទ្ធបដិមាផ្ចាញ់មារ ស្ថិត​នៅវត្តគិរីរតនារាម ឬ វត្តភ្នំយ៉ាត ស្ថិតនៅក្រុងប៉ៃលិន ខេត្តប៉ៃលិន។ ព្រះពុទ្ធបដិមាផ្ចាញ់មារដ៏ខ្ពស់សន្លឹមដាច់គេនៅលើកំពូលភ្នំ តម្កល់នៅលើរតនៈបល្ល័ងផ្កាឈូកមានកម្ពស់ប្រមាណជា ២១ ម៉ែត្រ។

រូបសំណាកតាដំបងក្រញូង

រូបលោកតាដំបងគ្រញូងមានកម្ពស់ប្រហែល ២០ម៉ែត្រ ដោយគិតចាប់ពីបាតក្រោម (ថ្នល់) ដល់ក្បាល ទទឹងខ្លួន ២ម៉ែត្រ ទទឹងស្មា ៤ម៉ែត្រ និងប្រវែងដំបង ៧ម៉ែត្រ ហើយប្រវែងពីជង្គង់ឆ្វេងទៅជង្គង់ស្តាំ ៦ម៉ែត្រ ដែលមាន​ទីតាំង​នៅក្នុងទីរួមខេត្តបាត់ដំបង៕

អត្ថបទ៖ វាសនា