រឿង “ថាំងចេងទៅចម្លងធម៌” ឆ្នាំ២០២២ ត្រូវអ្នកគាំទ្ររិះគន់កប់ៗមាត់

ថ្មីៗ​នេះ ​ខ្សែភាពយន្ត​រឿង “ថាំងចេងទៅចម្លងធម៌” ​(Journey to the West) ត្រូវ​បាន​ទស្សនិកជន​រិះគន់កប់ៗមាត់ ក្រោយបញ្ចេញ Poster ​​ថត​ឡើងវិញពីភាពយន្តដើមដែលចាក់ផ្សាយកាលពីឆ្នាំ​១៩៨៦។

រឿង “ថាំងចេងទៅចម្លងធម៌” គឺជាភាពយន្តមួយស្ថិតនៅក្នុងដួងចិត្តទស្សនិកជនអាស៊ីជាច្រើន ដូច្នេះការផលិតឡើងវិញ ជាក្ដីរំពឹងរបស់អ្នកគាំទ្រជាយូរមកហើយ។ ប៉ុន្តែបន្ទាប់ពីប្រកាសថត និងផ្សព្វផ្សាយ ​Poster ជាសាធារណៈ បែរជាត្រូវអ្នកគាំទ្រសម្ដែងការមិនពេញចិត្ត ខណៈរឿងជំនាន់ថ្មីហាក់ពុំមានអ្វីលេចធ្លោទាល់តែសោះ។

អ្នកនិយមលេងអ៊ីនធឺណិតបានវែកញែកអំពីភាពយន្តស៊េរីថ្មីយ៉ាងក្ដៅគគុក ក្រោមហេតុផលរឿងជំនាន់ ១៩៨៦ ជារឿងដ៏មានគុណភាពមិនថាបច្ចេកទេស ឬតួសម្ដែងឡើយ។ ចំណែកស៊េរីថ្មី ពិបាកទទួលយក ជាពិសេសតួ ស៊ុនអ៊ូខុង តែម្ដង។

មហាជនជាច្រើនបានគ្រវីក្បាល ដោយបង្ហាញពីភាពមិនពេញចិត្តរបស់ខ្លួន នៅពេលឃើញតារាជើងចាស់គ្មានវត្តមានសម្ដែងជាតួឯក ស្របពេលរឿងថ្មីបានប្ដូរតួទាំងអស់ លើកលែងតែតួព្រះយូឡាយមួយប៉ុណ្ណោះ ដែលបន្តនៅសម្ដែងដដែល។ យ៉ាងណាមិញ មហាជនជាច្រើនជឿថា ការលេចមុខរបស់តារាជើងចាស់រូបនេះ ក្នុងភាពយន្តដែលមិនសូវមានគុណភាព ក៏ប៉ះពាល់ដល់កេរ្តិ៍ឈ្មោះរបស់លោកផងដែរ។

ដោយឡែកចំពោះតួ ថាំងចេង ត្រូវទស្សនិកជនជាច្រើនបានបញ្ចេញមតិថា លោកហាក់ក្មេងពេក គ្មានភាពចាស់ទុំគ្រប់គ្រាន់ ឯតួ អ៊ូខុង វិញមិនមានជំនាញក្បាច់គុន គួរឱ្យចាប់អារម្មណ៍នោះទេ។

មកទល់នឹងពេលនេះ ភាពយន្តភាគថ្មី “ថាំងចេងទៅចម្លងធម៌” នៅតែទទួលបានការចាប់អារម្មណ៍ពីមហាជន ប៉ុន្តែមិនសូវទទួលបានការគាំទ្រច្រើននោះទេ។ ជាពិសេសនៅក្នុងបេះដូងអ្នកគាំទ្រ “ថាំងចេងទៅចម្លងធម៌” ឆ្នាំ១៩៨៦៕

ប្រែសម្រួល៖ សន្យា

ចុចអាន៖ ផ្ទុះរឿងអាស្រូវ ឈិនឡុង ជាមួយកូនស្រី

ចុចអាន៖ ទ្រព្យចាយមិនខ្វះ​ តែ ទិនហ្វី បែររិះថាំរឿងទាំងនេះខ្លាំងបំផុត