អ្នកជំនាញថា ប្រជាជន កូរ៉េខាងជើង ស្ទើរតែទាំងអស់នឹងឆ្លងកូវីដ

អ្នកជំនាញនៅប្រទេសកូរ៉េខាងត្បូងបាននិយាយថា ប្រសិនបើល្បឿននៃការរីករាលដាលជំងឺកូវីដ ១៩ នៅកូរ៉េខាងជើងនៅតែបន្តលឿនបែបនេះនោះ ប្រជាជនស្ទើរតែទាំងអស់ក្នុងប្រទេសនឹងគ្មាននរណាម្នាក់គេចផុតពីការឆ្លងវីរុសនេះឡើយ ។

បើយោងតាមកាសែតគណបក្សពលករកូរ៉េ Rodong Sinmun បានឲ្យដឹងថា ត្រឹមរយៈពេល ១ សប្ដាហ៍ប៉ុណ្ណោះ កូរ៉េខាងជើងបានរាយការណ៍ពីករណី “គ្រុនក្តៅ” សរុបចំនួន ២,៤៦០,៦៤០ ករណី ពោលប្រហែល ៨ ភាគរយនៃចំនួនប្រជាជន ២៦ លាននាក់របស់ខ្លួនបានឆ្លងមេរោគ ។

ចំណែកយោងតាមលោកវេជ្ជបណ្ឌិត Kim Sin-gon នាយកសមាគមថែទាំសុខភាពសម្រាប់ការបង្រួបបង្រួមកូរ៉េបាននិយាយថា ទោះជាយ៉ាងណាក៏ដោយ តួលេខពិតប្រាកដអាចកើនឡើងដល់ទៅ ៤ ទៅ ៥ ដងបន្ថែមទៀតឯណោះ បើធៀបទៅនឹងចំនួនផ្លូវការខាងលើ ។

លោក Kim បាននិយាយនៅក្នុងវេទិកាមួយកាលពីថ្ងៃសុក្រថា ក្នុងចំណោមករណីដែលត្រូវបានបញ្ជាក់ទាំងអស់នៅក្នុងប្រទេសកូរ៉េខាងត្បូងប្រហែល ២៥ ភាគរយគឺមិនបង្ហាញរោគសញ្ញា ហើយ ៣០ ភាគរយនៃករណីបង្ហាញរោគសញ្ញាបានវិវត្តទៅជាជំងឺគ្រុនក្តៅ ។

លោក Kim បញ្ជាក់ថា “ដោយសារតែការវិវត្តរោគសញ្ញាគ្រុនក្តៅក្នុងអ្នកជំងឺកូវីដ និងអត្រាឆ្លងមិនបង្ហាញរោគសញ្ញាផងនោះ ប្រជាជនកូរ៉េខាងជើងប្រហែលជា ១០ លាននាក់បានឆ្លងរួចទៅហើយ ហើយក្នុងល្បឿននេះ កូវីដអាចឆ្លងស្ទើរតែទាំងអស់ដល់ប្រជាជនកូរ៉េខាងជើងក្នុងរយៈពេលមួយខែទៀត” ។

គួរបញ្ជាក់ថា ចំនួនករណីឆ្លងដែលកូរ៉េខាងជើងរកឃើញជារៀងរាល់ថ្ងៃគឺស្ថិតនៅក្នុងចន្លោះពី ២០០,០០០ ទៅ ៣០០,០០០ ករណី ហើយរហូតមកដល់ពេលនេះក៏បានកត់ត្រាអ្នកស្លាប់ចំនួន ៦៥ នាក់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Korea Herald

ចុចអាន ៖​ លោក គីម ជុងអ៊ុន ពាក់ម៉ាសដល់ទៅ ២ ជាន់ការពារឆ្លងកូវីដ