ឆេះរោងចក្រដំឡើងម៉ូតូក្នុងតំបន់សេដ្ឋកិច្ចពិសេស ក្រុងបាវិត ខូចខាតម៉ូតូជាង៤០គ្រឿង

ម៉ូតូស៊េរីទំនើបចំនួន៣០គ្រឿងបានរងការខូចខាតទាំងស្រុង និង១១គ្រឿងទៀតខូចខាតបន្តិបន្ទួច ក្នុងហេតុការណ៍អគ្គិភ័យឆាបឆេះក្នុងរោងចក្រដំឡើងម៉ូតូមួយកន្លែង ខណៈសមត្ថកិច្ចកំពុងស្រាវជ្រាវពីមូលហេតុនៃការឆាបឆេះ។

ករណីអគ្គិភ័យឆាបឆេះបណ្ដាលឲ្យខូចខាតម៉ូតូជាង៤០គ្រឿងនេះ បានកើតឡើងកាលពីរសៀលថ្ងៃទី២៤ ខែឧសភា ឆ្នាំ២០២២ នៅក្នុងរោងចក្រ ស៊ីកូ ស្ថិតនៅតំបន់សេដ្ឋកិច្ចពិសេស មែនហាធេន ក្រុងបាវិត ខេត្តស្វាយរៀង។

តាមប្រភពព័ត៌មានបានឲ្យដឹងថា នៅមុនពេលកើតហេតុ កម្មកររោងចក្របានចូលធ្វើការជាធម្មតា លុះដល់វេលាកើតហេតុ ស្រាប់តែមានអណ្ដាតភ្លើង និងផ្សែងហុយចេញពីកន្លែងដាក់ម៉ូតូក៏មានការភ្ញាក់ផ្អើលនាំគ្នាយកបំពង់ពន្លត់អគ្គិភ័យមកបាញ់ពន្លត់ តែមិនអាចគ្រប់គ្រងស្ថានការណ៍បាន ទើបធ្វើឱ្យម៉ូតូជាច្រើនគ្រឿងឆេះសល់តែគ្រោងឆ្អឹង។

ទោះយ៉ាណា សមត្ថកិច្ចនៅមិនទាន់បញ្ជាក់ពីមូលហេតុនៃការឆាបឆេះនេះនៅឡើយទេ៕

អត្ថបទ៖ សុខុម