ផ្ទុះកំប៉ុងហ្គាសឆេះផ្ទះ១ខ្នងទាំងស្រុង ក្នុងក្រុងសិរីសោភ័ណ

ផ្ទះ១ខ្នងធ្វើអំឈើប្រកស័ង្កសីឆេះខ្ទេចអស់បណ្តាលមកពីផ្ទុះកំប៉ុងហ្គាស គិតជាទឹកប្រាក់ខ្ទង់ម៉ឺនដុល្លារឯណោះ។

រឿងរាវនេះកើតឡើងនៅវេលាម៉ោង៩យប់ ថ្ងៃទី២៥ ខែឧសភា ឆ្នាំ២០២២ ស្ថិតនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។

លោក ហុឹល រ៉ាយ៉ា អភិបាលក្រុងសិរីសោភ័ណ បានប្រាប់ឲ្យដឹថា ម្ចាស់ផ្ទះដែលភ្លើងឆេះនេះមានឈ្មោះ ទូច ជឿន ភេទប្រុស អាយុ៦០ឆ្នាំ រស់នៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។

បើតាមការអះអាងពីម្ចាស់ផ្ទះបានប្រាប់ឲ្យដឹងថា ផ្ទះគាត់ឆេះនេះបណ្តាលមកពីផ្ទុះកំប៉ុងហ្គាស ធ្វើឲ្យឆាបឆេះយ៉ាងសន្ធោសន្ធៅ ដោយមានកម្លាំងចំរុះទាំង៣ មានកម្លាំងអាវុធហត្ថ ស្នងការនគរបាល និងតំបន់ប្រតិបត្តិការសឹករងបន្ទាយមានជ័យ ក្នុងនោះមានរថយន្តរបស់អធិការនគរបាលក្រុង ចំនួន១គ្រឿង និងរថយន្តស្នងការនគរបាលខេត្ត១គ្រឿង ជួយបាញ់ទឹកពន្លត់ភ្លើងយ៉ាងសស្រាក់សស្រាំ ជាង១ម៉ោងទេីបគ្រប់គ្រងស្ថានការណ៍បានទាំងស្រុង។

លោក ហុឹល រ៉ាយ៉ា បានបន្តទៀតថា សម្ភារៈខូចខាតរួមមាន ផ្ទះអស់១ខ្នង ម៉ូតូ១គ្រឿង សម្ភារៈផ្សេងៗ និងថវិកាមួយចំនួន​ធំ គិតជាទឹកប្រាក់ខ្ទង់ម៉ឺនដុល្លារឯណោះ ។

ពាក្យចាស់លោកថា ស៊ូលិចទូកកណ្តាលទន្លេប្រសើរជាងភ្លើងសផ្ទះ កុំថាឡើយនៅសល់ទ្រព្យសម្បត្តិសូម្បីសត្វរស់នៅក្នុងផ្ទះក៏ស្លាប់ដែរ។

គួរបញ្ជាក់ថា ក្នុងករណីភ្លើងផ្ទះនេះមិនមានមនុស្សស្លាប់ឬរបួស និងឆេះដល់ផ្ទះអ្នកជិតខាងឡើយ៕

អត្ថបទ៖ វ៉ាន់ ណាង