ឧត្តមសេនីយចូលនិវត្តន៍របស់ រុស្ស៊ី រិះគន់លោក ពូទីន ចំពោះសង្គ្រាម អ៊ុយក្រែន

ឧត្តមសេនីយចូលនិវត្តន៍ម្នាក់របស់រុស្ស៊ីបានរិះគន់យ៉ាងចាស់ដៃដល់រដ្ឋបាលលោកប្រធានាធិបតី វ្ល៉ាឌីមៀ ពូទីន ដោយនិយាយថា ប្រតិបត្តិការយោធាពិសេសក្នុងប្រទេសអ៊ុយក្រែនបានចាញ់ទាំងក្នុងសង្គ្រាមយុទ្ធសាស្ត្រ និងព័ត៌មាន ក៏ដូចជាបង្កឲ្យមានភាពឯកោជាប្រវត្តិសាស្ត្ររបស់ប្រទេសផងដែរ ។

ឧត្តមសេនីយ៍ឯកចូលនិវត្តន៍លោក Leonid Ivashov បាននិយាយនៅក្នុងបទសម្ភាសន៍តាមអ៊ីនធឺណិតជាមួយកាសែតល្បីឈ្មោះមួយកាលពីដើមខែនេះថា ការគណនាខុសដ៏ធំមួយត្រូវបានធ្វើឡើងនៅក្នុងដំណាក់កាលដំបូងនៃប្រតិបត្តិការយោធា ជាក់ស្តែងឥឡូវនេះវាកំពុងជាប់គាំង ។

លោក Ivashov បានបញ្ជាក់ទៀតថា រុស្ស៊ីបានចាញ់ក្នុងន័យភូមិសាស្រ្តនយោបាយរួចហើយ ហើយបានចាញ់ក្នុងសង្គ្រាមព័ត៌មាន និងផ្លូវចិត្តទៀតផងដែរ ។

ទន្ទឹមនោះលោកក៏បានបន្តរិះគន់រដ្ឋមន្ត្រីការពារជាតិលោក Sergei Shoigu ផងដែរថា សាលាបណ្តុះបណ្តាលយោធារុស្ស៊ីតែងតែណែនាំកុំឲ្យមើលស្រាលសត្រូវ និងថែមទាំងឲ្យលោក ពូទីន គួរ​តែ​ស្តាប់​តាម​ដំបូន្មាន​របស់​អ្នក​ប្រឹក្សា​ដ៏​ឈ្លាស​វៃ ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោក ពូទីន ហៅថាជា “ប្រតិបត្តិការយោធាពិសេស” បានអូសបន្លាយពេលជាង ៣ ខែមកហើយ បន្ទាប់ពីទីក្រុងមូស្កូបើកការវាយលុកលើទីក្រុងកៀវកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ប្រទេសលោកខាងលិច និងរុស្ស៊ី តឹងសរសៃ ក ដាក់គ្នាជុំវិញសង្គ្រាមព័ត៌មាន នៅ អ៊ុយក្រែន