ចាប់សត្វចៀមមួយក្បាល ដាក់ពន្ធនាគារ ៣ឆ្នាំ ពីបទមនុស្សឃាត

សត្វចៀមមួយក្បាល ត្រូវបានកាត់ទោសឲ្យជាប់ពន្ធនាគាររយៈពេល ៣ ឆ្នាំ បន្ទាប់ពីសត្វចៀម ជល់ស្ត្រីម្នាក់រហូតដល់ស្លាប់។

ចៀមឈ្មោល បានជល់លោកស្រី Adhieu Chaping អាយុ ៤៥ ឆ្នាំ ចំទ្រូងជាច្រើនដង មុនពេលគាត់ស្លាប់កាលពីចុងសប្តាហ៍។

ជាការដាក់ទណ្ឌកម្ម សត្វចៀមនឹងត្រូវជាប់ពន្ធនាគារនៅជំរំយោធា បន្ទាប់ពីត្រូវបានកាត់ទោសដោយមេដឹកនាំប្រពៃណីនៅប្រទេស ស៊ូដង់ខាងត្បូង។

មេប៉ូលិសឈ្មោះ Elijah Mabor បានប្រាប់វិទ្យុ Eye Radio ថា “សត្វចៀមឈ្មោល បានជល់ចំឆ្អឹងជំនីរបស់ស្រ្តីម្នាក់ ហើយគាត់បានស្លាប់ភ្លាមៗ។ ដូច្នេះ នេះគឺជាអ្វី ដែលបានកើតឡើងនៅតំបន់ Rumbek East។ តួនាទីរបស់យើងជា ប៉ូលិសគឺត្រូវផ្តល់សុវត្ថិភាព។ សត្វចៀម ត្រូវបានចាប់ ហើយបច្ចុប្បន្នកំពុងស្ថិតក្រោមការឃុំឃាំងនៅប៉ុស្តិ៍ប៉ូលិស Maleng Agok Payam”។

ម្ចាស់​ចៀម ​ត្រូវ​បាន​គេ​ស្គាល់​ឈ្មោះ​ថា Duony Manyang Dhal។ បើ​តាម​លោក Paul Adhong Majak មន្ត្រីជាន់ខ្ពស់ក្នុងតំបន់​បាន​ឲ្យ​ដឹង​ថា ម្ចាស់​ផ្ទះ​និង​ក្រុម​គ្រួសារ​ជន​រង​គ្រោះ គឺ​មាន​ទំនាក់​ទំនង​និង​ជា​អ្នក​ជិត​ខាងនឹងគ្នា។

គួរបញ្ជាក់ថា ករណីវាយប្រហារដោយសត្វចៀម ក៏ធ្លាប់កើតឡើងផងដែរក្នុងកសិដ្ឋានមួយ នៅសហរដ្ឋអាមេរិក។

លោកស្រី Kim Taylor ត្រូវ​បាន​សត្វ​ចៀម​វាយ​ប្រហារ ​ពេល​កំពុង​ធ្វើ​ការ​នៅកសិដ្ឋាន Cultivate Care ក្នុង​ទីក្រុង Bolton រដ្ឋ Massachusetts៕

ប្រែសម្រួល៖ Vann Vann

ប្រភព៖ Daily Star

ចុចអាន៖ អភិបាលខេត្តកំពង់ឆ្នាំងគ្រោងពង្រីកការចិញ្ចឹមសត្វចៀមយកសាច់ផ្គត់ផ្គង់ទីផ្សារ និងទាក់ទាញទេសចរណ៍