លោក ថោង ខុន៖ ហេតុផលបីយ៉ាង នាំឱ្យភ្ញៀវ​ទេសចរធ្លាក់ចុះជិត ១០ភាគរយ​នៅសប្តាហ៍នេះ

ភ្ញៀវទេសចរផ្ទៃក្នុង នៅចុងសប្តាហ៍កន្លងទៅនេះ បានធ្លាក់ចុះចំនួន ៩.៥១%​ បើធៀបនឹងសប្តាហ៍កន្លងទៅ។ ពោលគឺមានចំនួន ២៧៤,០២៦នាក់ ក្នុងនោះ ភ្ញៀវជាតិ២៥៩,៣៩៣នាក់ និងភ្ញៀវបរទេសផ្ទៃក្នុង១៤,៦៣៣នាក់។ ប៉ុន្តែបើទោះជាចំនួននេះ មានការថមថយជាងសប្តាហ៍កន្លងទៅ តែនៅប្រហាក់ប្រហែលចំនួនភ្ញៀវមុនពេលកូវដី-១៩ ស្ថិតក្នុងរង្វង់ជាមធ្យមប្រមាណ២៥-៣០ម៉ឺននាក់ ក្នុងមួយសប្តាហ៍។

ចំពោះមូលហេតុដែលនាំឱ្យចំនួនភ្ញៀវទេសចរ មានការធ្លាក់ចុះនេះ លោក ថោង ខុន បានឱ្យដឹងថា ដោយសារ មូលហេតុបីយ៉ាង គឺទី១ ដោយសារប្រជាពលរដ្ឋមួយចំនួនបានកាត់បន្ថយការធ្វើដំណើរទៅកាន់​គោលដៅ​ទេសចរណ៍​ឆ្ងាយៗ ដោយសារការកើនឡើងតម្លៃប្រេងឥន្ទនៈ, ទី២ មន្ត្រីរាជការភាគច្រើនជាប់រវល់នឹងការងារចុះមូលដ្ឋាន ប្រឡូក​ក្នុងការឃោសនាបោះឆ្នោត នៅតាមមូលដ្ឋានឃុំ-សង្កាត់របស់ខ្លួន មិនមានពេលនាំគ្រួសារដើរកម្សាន្តចុងសប្តាហ៍, និងមូលហេតុទី៣ គឺកម្មករ-កម្មការនី ក៏នឹងរង់ចាំពេលឈប់សម្រាក បាន៣ថ្ងៃចុងសប្តាហ៍ក្រោយ ទៅចូលរួម​បោះឆ្នោតនៅស្រុកកំណើតផង និងដើរកម្សាន្តផង។

លោករដ្ឋមន្រ្តី ថោង ខុន បានបន្តថា គោលដៅទេសចរណ៍សំខាន់ៗ រួមមាន ខេត្តព្រះសីហនុ ៥៦.២៥១នាក់ ខេត្តបាត់ដំបង៣៩.៩២៩នាក់ រាជធានីភ្នំពេញ៣៦.២៨២នាក់ ខេត្តកំពត៣១.១២១នាក់ ខេត្តសៀមរាប១៩.៧៨២នាក់ ខេត្តកំពង់ស្ពឺ១១.៥៤៥នាក់ និងខេត្តពោធិ៍សាត់១០.៨៤៥នាក់៕