អ្នកភូមិ​ចម្លែក​ចិត្ត ក្រោយ​ឃើញ​គំនរ​សម្រាម​ គរពេញ​​របងមន្ទីរឧតុនិយមខេត្តបាត់ដំបង

ផ្លូវក្រាលកៅស៊ូមួយខ្សែតភ្ជាប់ពីផ្លូវជាតិលេខ ៥ ស្ថិត​នៅ​ត្រង់ចំណុចភូមិរំចេក៤ សង្កាត់រតន: ក្រុងបាត់ដំបងជាប់​របង​មន្ទីរ​ឧតុនិយម​ខេត្តទល់មុខសាខាកាកបាទក្រហម បានក្លាយជាកន្លែងលួចដាក់កាកសំណល់មិនធ្លាប់មាន បង្កការរិះគន់ពីអ្នកភូមិ។

អ្នកភូមិរំចេក ៤ ដែលនៅក្បែររបងមន្ទីរឧតុនិយមខេត្ត​បាន​ឲ្យ​ដឹ​ង​ថា កន្លែងដែលមានកាកសំណល់ច្រើនគឺនៅក្បែរការាស់សាំង​វេងស្រុន និងកន្លែងគេជួលធ្វើអាជីវកម្មជាប់ផ្លូវជាតិលេខ ៥ ដែល​តាំងពីដើមមកគឺគ្មានកាកសំណល់បែបនេះទេ។

បើ​តាមប្រភព​អ្នកភូមិ​ រាល់កាកសំណល់ផ្សេងៗ​របស់អ្ន​កភូមិ​គឺដាក់តាមមុខផ្ទះ មានរថយន្តក្រុមអនាម័យយូរៗមកយកម្តង ហើយ​ពេលខ្លះពួកគាត់​ក៏​ដុតចោលដោយខ្លួនឯងទៅ​ មិនធ្វើអំពើមិនគប្បីចោលផ្តេសផ្តាសបែបនេះទេ។

ត្រង់ចំណុចលើកឡើងនេះបានក្លាយជាសំនួរចោទសួររបស់អ្នក​ភូមិ​បែបនេះថា “ពួកខ្ញុំដូចជាឆ្ងល់បន្តិចថា ហេតុអីកាកសំណល់នៅចិញ្ចើមផ្លូវចូលមកក្នុងភូមិម្តុំផ្ទះពួកខ្ញុំ មើលឃើញច្បាស់យ៉ាងនេះ ហើយរថយន្តអនាម័យតែងតែចូលមកដឹកសំរាម​ និងកាកសំណល់ពីក្នុងភូមិពួកយើង ហើយក្រុមហ៊ុនដូចជាមិនយកចិត្តទុកដាក់ក្នុងការប្រមូលសោះចឹង”?។

ពាក់ព័ន្ធកាកសំណល់ខាងលើយុវជនឈ្មោះ”សីលា”ជាសិស្សថ្នាក់ទី១២ និង”គឹមសុង”ជាសិស្សថ្នាក់ទី ៧ បាននិយាយឲ្យដឹងប្រហាក់ប្រហែលគ្នាយ៉ាងដូច្នេះដែរថា “ខ្ញុំទាំងពីរនាក់បងប្អូនតែងធ្វើដំណើរទៅសាលារាល់ថ្ងៃខែឆ្នាំ តាំងពីខ្ញុំរៀន​ថ្នាក់ទី ១ រហូតដល់ថ្នាក់ទី១២នាពេលបច្ចុប្បន្ន ចំណុចខាងលើកន្លងមកពួកខ្ញុំមិនដែលឃើញមានអ្នកចោលសម្រាមនិងកាកសំណល់បែបនេះទេ ពេលពួកខ្ញុំជិះទៅសាលាម្តងៗ។ តែពេលនេះពិតជាមើលទៅគួឲ្យខ្ពើមណាស់ហើយពេលខ្លះធំក្លិនទៀតផង។

ប្រជាពលរដ្ឋក្នុងភូមិ ក៏សំណូមពរឲ្យអាជ្ញាធរក្រុងមកវែកមុខរកអ្នកដែលចោលកាកសំណល់ផ្តេសផ្តាសដែលមិនធ្លាប់មានលើចំណុចខាងលើឲ្យបានច្បាស់ និងធ្វើការណែនាំបញ្ឈប់ទង្វើបែបនេះទៀត ត្រូវចេះវេចខ្ចប់ឲ្យបានត្រឹមត្រូវហើយឲ្យក្រុមជំនាញមកប្រមូលយកទៅដុតកំទេច​ចោល​ផង​ ចៀសវាងបង្កឲ្យកាន់តែច្រើនឡើងប៉ះពាល់ដល់សុខភាពសាធារណះ​៕

អត្ថបទ៖ សៅ សារិទ្ធ