Update៖ ធ្យូងជាង ៥០តោន ត្រៀមដឹកចេញ​ទៅវៀតណាម ត្រូវសមត្ថកិច្ចរឹបអូស

ស្វាយរៀង៖ កម្លាំងចម្រុះ បានរឹបអូសធ្យូងប្រមាណ ៥៤តោន ដែលឈ្មួញបានដឹកយកមកទម្លាក់នៅមាត់ប្រឡាយ​ទាហាន ហើយត្រៀមលើក​ដាក់ចូលក្នុងទូកកាណូតវៀតណាម ដើម្បីឆ្លងដែនទៅប្រទេសវៀតណាម នៅរសៀលថ្ងៃទី ០២ ខែ មិថុនា ឆ្នាំ ២០២២។

លោកវរៈសេនីយ៍ឯក ស្រី វុត្ថា មេបញ្ជាការរងកងរាជអាវុធហត្ថខេត្តស្វាយរៀង ដោយទទួលបានការអនុញ្ញាតពី​លោកព្រះរាជ​អាជ្ញាអមសាលាដំបូងខេត្តស្វាយរៀង បានដឹកនាំកំលាំងចម្រុះ ចុះមកធ្វើការត្រួតពិនិត្យ និងរឹបអូសធ្យូងទាំងនោះយកទៅរក្សាទុកនៅមន្ទីរកសិកម្មរុក្ខាប្រម៉ាញ់ និងនេសាទខេត្តស្វាយរៀង ដើម្បីចាត់ការបន្តទៅតាមនីតិវិធីច្បាប់។

សមត្ថកិច្ច មិនទាន់ស្រាវជ្រាវដឹងថា ធ្យូងទាំងនេះ មានម្ចាស់ជានរណានោះទេ។ ចំណែកពលរដ្ឋបានលើកឡើងថា គេឃើញឈ្មួញបានដឹកធ្យូងមកទម្លាក់បម្រុងចេញទៅប្រទេសវៀតណាមនេះ កើតឡើងរយៈពេល៣ថ្ងៃមកហើយ ចាប់តាំងពីថ្ងៃទី៣០ ខែឧសភា ឆ្នាំ២០២២ ដល់ យប់ថ្ងៃទី០១ ខែមិថុនា ឆ្នាំ២០២២ នៅចំណុចប្រឡាយទាហាន ច្រករបៀងស្លាបឆ្វេងនៃច្រកទ្វារព្រំដែនអន្តរជាតិព្រៃវល្លិ៍ ស្ថិតនៅភូមិព្រៃអូរ ឃុំថ្មី ស្រុកកំពង់រោទិ៍ខេត្តស្វាយរៀង។

ក្រសួងកសិកម្មរុក្ខាប្រម៉ាញ់និងនេសាទ មិនអនុញ្ញាតិឲ្យមានការនាំធ្យូង ចេញទៅក្រៅប្រទេសនោះទេ ព្រោះជាហេតុផលជួញដូរធ្យូង ឈើ ធ្វើឲ្យប៉ះពាល់ដល់ព្រៃឈើ៕ ដោយ:ភក្ដី