ការឆ្លងជំងឺអុតស្វា ហក់ឡើងលឿនណាស់ កើនដល់ជាង ១០០០ករណីហើយ (មានវីដេអូ)

មានការឆ្លងជំងឺអុតស្វា (Monkeypox) ច្រើនជាង ១០០០ករណី ត្រូវបានរាយការណ៍ទៅអង្គការសុខភាពពិភពលោក (WHO) ក្នុងការផ្ទុះឡើងនាពេលបច្ចុប្បន្ន នៅខាងក្រៅទ្វីបអាហ្រ្វិក។

អគ្គនាយក WHO លោក Tedros Adhanom Ghebreyesus បាននិយាយថា ហានិភ័យនៃជំងឺអុតស្វា គឺមានពិតប្រាកដ ប៉ុន្តែយើងអាចការពារបាននៅចំណុចនេះ។

ប្រទេសចំនួន២៩ ខាងក្រៅទ្វីបអាហ្វ្រិក បានរាយការណ៍ករណីឆ្លង នៅក្នុងការផ្ទុះឡើងនាពេលបច្ចុប្បន្ន ដែលចាប់ផ្តើមកាលពីខែឧសភា។ យ៉ាងណាក្តី ក្នុងចំណោមនោះ គ្មានប្រទេសណារាយការណ៍អំពីការស្លាប់ទេ។

នៅឯសន្និសីទសារព័ត៌មានក្នុងទីក្រុងហ្សឺណែវ ប្រទេសស្វីស លោក Tedros ក៏បាននិយាយផងដែរថា មានករណីសង្ស័យ កើតជំងឺអុតស្វាជាង ១៤០០ ករណី ត្រូវបានរាយការណ៍ក្នុងឆ្នាំនេះនៅទ្វីបអាហ្រ្វិក និងមានអ្នកស្លាប់ចំនួន ៦៦ នាក់។

លោកនិយាយថា “នេះជាការឆ្លុះបញ្ជាំងដ៏អកុសលក្នុងពិភពលោកដែលយើងរស់នៅ ដែលសហគមន៍អន្តរជាតិទើបតែយកចិត្តទុកដាក់ ចំពោះជំងឺអុតស្វា ព្រោះជំងឺនេះបានលេចឡើងនៅក្នុងប្រទេសដែលមានប្រាក់ចំណូលខ្ពស់”។

ការ​ផ្ទុះ​ឡើង​នេះ ​កំពុង​បង្ហាញ​សញ្ញា​នៃ​ការ​ឆ្លងក្នុង​សហគមន៍​នៅ​ប្រទេស​មួយ​ចំនួន។ WHO សូមណែនាំអ្នកដែលកើតជំងឺអុតស្វា ត្រូវនៅដាច់ដោយឡែកពីគេ ក្នុងផ្ទះ។

WHO បញ្ជាក់ថា ករណីឆ្លងនៅតែកើតមានភាគច្រើនក្នុងចំណោមបុរសដែលរួមភេទជាមួយបុរស ថ្វីបើករណីចំពោះស្ត្រីក៏ត្រូវបានរាយការណ៍ផងដែរ ក៏ដោយ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ មិនដល់១ខែផង ជំងឺអុតស្វា វាយប្រហារ២៧ប្រទេស មានអ្នកឆ្លងដល់ ៧៨០ករណី