​ទំនៀមទម្លាប់ចម្លែកៗទាំង៥លើលោកដែលមិនសូវមានអ្នកដឹង

នៅលើពិភពលោកនេះ មានជំនឿវប្បធម៌ផ្សេងគ្នា ហើយប្រពៃណីទំនៀមទម្លាប់ក៏ខុសៗគ្នាដែរ។ប៉ុន្តែមានប្រទេសខ្លះ ក៏ដូចជា កុលសម្ព័ន្ធមួយចំនួន មាន​ទំនៀមទម្លាប់ប្រពៃណីចម្លែកៗ និងអាចបង្កគ្រោះថ្នាក់ដល់អាយុជីវិតថែមទៀតផង។ ខាងក្រោមនេះ គឺជាទំនៀមទម្លាប់ចម្លែកៗចំនួន ៥ នៅជុំវិញពិភពលោក៖

១. ការប្រមាញ់រកគូស្នេហ៍នាពេលយប់ នៅក្នុងប្រទេសប៊ូតាន

ពិធីនេះពេញនិយមបំផុតសម្រាប់បុរសវ័យក្មេងដែលកំពុងស្វែងរកគូស្នេហ៍ ហើយគេប្រមាញ់រកគូស្នេហ៍នេះនៅពេលយប់។ នៅពេលបុរសស្វែងរកស្ត្រីឃើញហើយ មានន័យថា គាត់អាចរៀបអាពាហ៍ពិពាហ៍ជាមួយស្ត្រីនោះបាន។

២. ការពាក់ស្រោមដៃ​ស្រមោច​ភ្លើងរបស់កុលសម្ព័ន្ធ Satere-Mawe

ប្រពៃណីរបស់កុលសម្ព័ន្ធនេះ ក្មេងប្រុសដែលឈានដល់ពេញវ័យ ត្រូវពាក់ស្រោមដៃដែលពោរពេញស្រមោចភ្លើង។ គេគិតថា ការឈឺចាប់បន្ទាប់ពី​ការខាំរបស់​ស្រមោចនេះប្រៀប​ដូចការត្រូវ​គ្រាប់​កាំភ្លើងពិតៗ។ បុរសកុលសម្ព័ន្ធនេះ ត្រូវឆ្លងកាត់ពិធីនេះយ៉ាងហោចណាស់ ២០ ដងក្នុងមួយជីវិតរបស់ពួកគេ។

៣. ពិធីបុណ្យស្បែកកម្ម Thaipusam

ពិធីនេះប្រារព្ធឡើងដោយពួកហិណ្ឌូនៅភាគខាងត្បូងប្រទេសឥណ្ឌា ដើម្បីបង្ហាញជ័យជំនះរបស់ អាទិទេព Lord Murugan លើវិញ្ញាណអាក្រក់ៗ។ អ្នកកាន់សាសនានេះ បានចាក់ទម្លុះខ្លួនដោយវត្ថុមុតស្រួចតាមផ្នែកផ្សេងៗនៃខ្លួនប្រាណរបស់ពួកគេរួចដើរដង្ហែជាក្បួនតាមផ្លូវ។

៤. ការហាមឃាត់មិនឲ្យចូលបន្ទប់ទឹកបន្ទាប់ពីរៀបការរួច

គូស្វាមីភរិយាថ្មីថ្មោងនៃសហគមន៍ Tidong ក្នុងប្រទេសឥណ្ឌូនេស៊ី ត្រូវបានហាមឃាត់មិនឱ្យប្រើ ប្រាស់បន្ទប់ទឹករយៈពេល ៣ ថ្ងៃ បន្ទាប់ពីរៀបការរួច។ បើហ៊ានបំពានច្បាប់នេះ នោះនឹងនាំមកនូវសំណាងអាក្រក់នៅក្នុងជីវិតអាពាហ៍ពិពាហ៍របស់ពួកគេ។

៥. ការបោះទម្លាក់ក្មេង នៅប្រទេសឥណ្ឌា

​នៅក្នុងរដ្ឋ Gujarat, Maharashtra និង Karnataka នៅប្រទេសឥណ្ឌា កុមារដែលទើបចេះដើរតេះតះ ត្រូវបានបោះទម្លាក់ពីលើដំបូលប្រាសាទ ហើយត្រូវយកភួយមកទ្រ។ ការធ្វើបែបនេះគេជឿថា​ នាំ​សំណាង​ដល់​កូនក្មេង៕

ដោយ ៖នាងតូច