រុស្ស៊ី ផ្ដល់ប្រាក់ខែថ្មីឲ្យទាហានដែលកំពុងប្រយុទ្ធនៅ អ៊ុយក្រែន

យោងតាមសារព័ត៌មាន BBC បានរាយការណ៍ថា ប្រទេសរុស្ស៊ីកំពុងផ្តល់ប្រាក់បៀវត្សរ៍ចំនួន ៤,០០០ ដុល្លារក្នុងមួយខែដល់ទាហានរុស្ស៊ីសម្រាប់ការប្រយុទ្ធនៅអ៊ុយក្រែន ។

ដោយឡែកសារព័ត៌មាន The Wall Street Journal ក៏បានឲ្យដឹងដែរថា យោធាបានដំឡើងប្រាក់បៀវត្សរ៍នេះសម្រាប់ទាហានជាប់កិច្ចសន្យា បន្ទាប់ពីបំពេញកាកត្វកិច្ចពេញលេញដូចជា បំផ្លាញយន្តហោះ និងរថក្រោះរបស់សត្រូវជាដើម ។

ពាក់ព័ន្ធនឹងបញ្ហានេះដែរ អ៊ុយក្រែនបាននិយាយកាលពីចុងសប្តាហ៍មុនថា រុស្ស៊ីក៏បានបញ្ជូនទាហានបម្រុងទាំងនោះទៅកាន់ភាគខាងកើតអ៊ុយក្រែនដើម្បីពង្រឹងទីតាំងរបស់ខ្លួន និងបំបែកភាពជាប់គាំង ។

ទន្ទឹមនោះ វាក៏កើតឡើង ស្របពេលដែលកងកម្លាំងរបស់លោកប្រធានាធិបតីរុស្ស៊ី វ្ល៉ាឌីមៀ ពូទីន បានបង្វែរការលុកលុយរបស់ពួកគេដោយផ្តោតលើភាគខាងកើតអ៊ុយក្រែនវិញ បន្ទាប់ពីយោធារុស្ស៊ីបរាជ័យក្នុងការដណ្តើមយកទីក្រុងកៀវក្នុងរយៈពេលប៉ុន្មានសប្តាហ៍ ក្រោយការលុកលុយកាលពីចុងខែកុម្ភៈ ។

ចាប់តាំងពីថ្ងៃទី ២៤ ខែកុម្ភៈមក រុស្ស៊ីបាននិងកំពុងធ្វើប្រតិបត្តិការយោធាពិសេសមួយដើម្បីកម្ទេច និងកម្ចាត់តំបន់គ្មានយោធាអ៊ុយក្រែន ខណៈលោក ពូទីន បាននិយាយថា គោលដៅនៃប្រតិបត្តិការនេះគឺ “ការការពារមនុស្សដែលត្រូវបានទទួលរងនូវការរំលោភបំពាន និងការប្រល័យពូជសាសន៍ដោយទីក្រុងកៀវអស់រយៈពេល ៨ ឆ្នាំកន្លងមកនេះ ក៏ដូចជាការរំដោះតំបន់ Donbass ទាំងស្រុងផងដែរ” ៕

ប្រែសម្រួលដោយ ៖ ជីវ័ន្ត

ប្រភព ៖ Business Insider