ព័ត៌មានអន្ដរជាតិ

តុលាការកំពូលនិយាយថា ពលរដ្ឋអាមេរិកមានសិទ្ធិកាន់កាំភ្លើងទីសាធារណៈ

បានផុស

២ years មុន

នៅ

ថ្ងៃសុក្រ ២៤ មិថុនា ២០២២

ដោយ

តុលាការកំពូលសហរដ្ឋអាមេរិកកាលពីថ្ងៃព្រហស្បតិ៍ម្សិលមិញបានសម្រេចថា ពលរដ្ឋអាមេរិកមានសិទ្ធិជាមូលដ្ឋានដើម្បីកាន់អាវុធនៅទីសាធារណៈដែលបានក្លាយជាការសម្រេចចិត្តដ៏គួរឲ្យចាប់អារម្មណ៍មួយស្របពេលរដ្ឋ និងទីក្រុងទូទាំងប្រទេសកំពុងប្រឈមនឹងហិង្សាដោយអាវុធ។

ការសម្រេចដោយសំឡេង៦ទល់៣ប្រឆាំងនឹងច្បាប់របស់ទីក្រុងញូវយ៉កដែលមានអាយុកាលជាងមួយសតវត្សរ៍ដែលតម្រូវឲ្យបុគ្គលម្នាក់ៗបង្ហាញថា ពួកគេមានសិទ្ធិការពារខ្លួនស្របច្បាប់ត្រូវទទួលបានការអនុញ្ញាតឲ្យកាន់កាំភ្លើងខ្លីលាក់ទុកក្នុងខ្លួននៅពេលពួកគេចេញក្រៅផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋចំនួន៦ផ្សេងទៀត រាប់ទាំង កាលីហ្វញ៉ា និងវ៉ាស៊ីនតោន ដែលជារដ្ឋធានីរបស់ជាតិ មានច្បាប់ស្រដៀងគ្នានេះដែរ ហើយការសម្រេចនេះនឹងរារាំងដល់សមត្ថភាពរបស់ពួកគេក្នុងការរឹតបន្តឹងប្រជាជនពីការកាន់អាវុធនៅទីសាធារណៈ។

អ្នកប្រជាធិបតេយ្យ លោកប្រធានាធិបតី ចូ បៃដិន បានថ្កោលទោសចំពោះការសម្រេចចិត្តនេះដោយនិយាយថា ៖«វាផ្ទុយទៅនឹងសុភវិនិច្ឆ័យ និងរដ្ឋធម្មនុញ្ញ ហើយអាចធ្វើឲ្យបញ្ហាកាន់តែអាក្រក់ដល់យើងទាំងអស់គ្នា»។

លោក បៃដិន មានប្រសាសន៍ថា ៖«យើងត្រូវតែធ្វើឲ្យបានច្រើនជាងនេះ ដើម្បីការពារពលរដ្ឋអាមេរិករបស់យើង។ ខ្ញុំសូមអំពាវនាវដល់ពលរដ្ឋអាមេរិកទូទាំងប្រទេសឲ្យធ្វើការបញ្ចេញសំឡេងដើម្បីសុវត្ថិភាពកាំភ្លើង»។

ទោះបីជាការអំពាវនាវកំពុងកើនឡើងឲ្យមានការដាក់កម្រិតលើការកាន់កាប់អាវុធ បន្ទាប់ពីមានការបាញ់ប្រហារដ៏រន្ធត់ពីរលើកកាលពីខែឧសភា ក៏តុលាការបាននិយាយថា រដ្ឋធម្មនុញ្ញអាមេរិកធានាសិទ្ធិផ្ទាល់ខ្លួន និងការកាន់អាវុធ។

ការសម្រេចនេះគឺជាលើកដំបូងដោយតុលាការក្នុងករណីវិសោធនកម្មធំទី២គិតចាប់តាំងពីឆ្នាំ២០០៨ នៅពេលតុលាការបានសម្រេចថា ពលរដ្ឋអាមេរិកមានសិទ្ធិកាន់កាំភ្លើងនៅផ្ទះដើម្បីការពារខ្លួន៕

ប្រែសម្រួល៖ វីរបុត្រ
ប្រភព៖ AFP