អាជ្ញាធរ​ចាប់ដៃជាមួយអង្គការ​សំអាតទន្លេ​សមុទ្រ​ចុះប្រមូលសំរាម​តាមដងទន្លេបាសាក់ភូមិសាស្ត្រ​ច្បារអំពៅ

រដ្ឋបាលខណ្ឌច្បារអំពៅ ​សហការជាមួយ​អង្គការសំអាតទន្លេសមុទ្រ នៅព្រឹកថ្ងៃទី ២៤ ខែមិថុនា ឆ្នាំ ២០២២ នេះ បានចុះបើកយុទ្ធនាការ​ចុះប្រមូលសំរាម ​សំអាតច្រាំងទន្លេបាសាក់​នៅភូមិសាស្ត្រ​ខណ្ឌច្បារអំពៅ រាជធានីភ្នំពេញ។

ជាយុទ្ធនាបេសកកម្មសំអាតទន្លេជាប្រវត្តិសាស្រ្តរយៈពេល ២ ថ្ងៃ ចាប់ពីថ្ងៃទី ២៤-២៥ ខែមិថុនា ចាប់ពីម៉ោង ៧ ដល់ ម៉ោង ១០ ព្រឹក។

លោក ចេង មុនីរ៉ា អភិបាលខណ្ឌច្បារអំពៅ មានប្រសាសន៍ថា ការចុះបើកយុទ្ធនាការសម្អាតសំរាម​នៅតំបន់មាត់ទន្លេច្បារអំពៅនាព្រឹកនេះគឺផ្តោតសំខាន់ទៅលើការបញ្ចប់បញ្ហាសំរាម ដើម្បីជួយលើក​កម្ពស់ធនធាន​ធម្មជាតិ​ជីវជម្រុះ​នៅក្នុងទន្លេ ព្រមទាំងរួមចំណែកជួយបង្កើន ការយល់ដឹង​ដល់ប្រជា​ពលរដ្ឋដែលរស់នៅតាមដងទន្លេ និងសមុទ្រ ពិសេសផ្តោតលើការទុកដាក់វេចខ្ចប់សំរាមនៅតាមផ្ទះ​ឲ្យបានត្រូវ។

លោកអភិបាលខណ្ឌច្បារអំពៅ បានបញ្ជាក់ថា ចំពោះបេសកកម្មនេះ ធ្វើឡើងដើម្បីជួយជំរុញ និង​បំផុសឲ្យមានការចូលរួមពីសាធារណជន ភាគីពាក់ព័ន្ធ ក្នុងគោលដៅធ្វើឲ្យពិភពលោកស្អាត គ្មានសំរាម និងចូលរួមសំអាតបរិស្ថានគ្រប់ទីកន្លែងគ្រប់ពេលវេលា។

យុទ្ធនាការ​នៅព្រឹកនេះ មានអាជ្ញាធរ ​ប្រជាពលរដ្ឋ សិស្សនិស្សិត ​ព្រះសង្ឃ ប្រមាណជាង ១០០ នាក់ ចូលរួម​ដើររើសសំរាម​តាមមាត់ច្រាំងដងទន្លេ​បាសាក់ក្នុងភូមិសាស្ត្រខណ្ឌច្បារអំពៅ៕

អត្ថបទ៖ ឌឿន ចាន់ថារី