ផ្សារទំនើបអ៊ុយក្រែន មានមនុស្ស ១០០០នាក់ រងការវាយប្រហារដោយមីស៊ីលរុស្ស៊ី ខណៈ G7 ថ្កោលទោសខ្លាំងៗ

មនុស្សចំនួន១៦នាក់បានស្លាប់ នៅក្នុងការវាយប្រហារដោយមីស៊ីល លើផ្សារទំនើបមួយក្នុងទីក្រុង Kremenchuk របស់ប្រទេសអ៊ុយក្រែន ដែលមានចម្ងាយប្រហែល ១៣០គីឡូម៉ែត្រពីតំបន់ដែលគ្រប់គ្រងដោយ រុស្ស៊ី។

លោកប្រធានាធិបតី Volodymyr Zelensky បាននិយាយថា ជនស៊ីវិលប្រហែល ១០០០ នាក់ត្រូវបានគេប៉ាន់ប្រមាណថា ស្ថិតនៅខាងក្នុងផ្សារទំនើបដ៏មមាញឹក ខណៈពេលមានការវាយប្រហារនៅម៉ោងប្រហែល ១៥:៥០ (ម៉ោងនៅអ៊ុយក្រែន)។

មនុស្សចំនួន៥៩នាក់ក៏រងរបួសផងដែរក្នុងការវាយប្រហារ ហើយមានការភ័យខ្លាចថា ចំនួនអ្នកស្លាប់នឹងបន្តកើនឡើង។

ទោះបីជាយ៉ាងណាក៏ដោយ វិមានក្រឹមឡាំងមិនទាន់ឆ្លើយតបចំពោះរឿងនេះទេ។

មេដឹកនាំនៃក្រុមប្រទេសអ្នកមានបំផុត G7 ដែលកំពុងជួបប្រជុំនៅប្រទេសអាល្លឺម៉ង់ បានថ្កោលទោសការវាយប្រហារនេះថា “គួរឲ្យស្អប់ខ្ពើមបំផុត”។

មេដឹកនាំ G7 បាននិយាយនៅក្នុងសេចក្តីថ្លែងការណ៍រួមថា “ការវាយប្រហារមិនរើសមុខលើជនស៊ីវិលស្លូតត្រង់ គឺជាឧក្រិដ្ឋកម្មសង្គ្រាម”។

សេវាសង្គ្រោះបន្ទាន់រដ្ឋ អ៊ុយក្រែន ដែលបានផ្តល់ព័ត៌មានថ្មីៗអំពីចំនួនអ្នកស្លាប់ និងរបួស បាននិយាយថា អង្គភាពចំនួន ៥៧ បានចូលរួមក្នុងការពន្លត់អគ្គិភ័យ។

យោងតាមបញ្ជាការកងទ័ពអាកាសអ៊ុយក្រែន, ផ្សារទំនើបនេះ ត្រូវបានវាយប្រហារដោយមីស៊ីល Kh-22 ដែលបាញ់ចេញពីយន្តហោះទម្លាក់គ្រាប់បែករយៈចម្ងាយឆ្ងាយធុន Tu-22M3។

គួរបញ្ជាក់ថា ទីក្រុង Kremenchuk ក្នុងខេត្ត Poltava គឺជាទីក្រុងឧស្សាហកម្មធំបំផុតមួយរបស់ប្រទេសអ៊ុយក្រែន ដែលមានប្រជាជនជិត ២២០ ០០០នាក់នៅក្នុងជំរឿនឆ្នាំ ២០២១។

នេះមិនមែនជាលើកទីមួយទេ ដែលទីក្រុងត្រូវបានវាយប្រហារដោយមីស៊ីល។ មានការវាយប្រហារមួយលើកនៅក្នុងខែមេសា និងកាលពី ១០ថ្ងៃមុននៅឯរោងចក្រចម្រាញ់ប្រេង ក្បែរនោះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ លើកដំបូងហើយ! អ៊ុយក្រែន ប្រើរ៉ុកកែតផ្តល់ដោយអាមេរិក បាញ់សម្លាប់កងទ័ពរុស្ស៊ី រាប់សិបនាក់