សមាជិកណាតូ ថា មានតែការប្រយុទ្ធគ្នាលើសមរភូមិប៉ុណ្ណោះ ទើបអាចបញ្ចប់ជម្លោះនៅ អ៊ុយក្រែន បាន (មានវីដេអូ)

នាយករដ្ឋមន្ត្រីបែលហ្ស៊ិក លោក Alexander De Croo បាននិយាយកាលពីថ្ងៃពុធទី២៩ខែមិថុនាថា ប្រទេសបែលហ្ស៊ិកជឿថា ជម្លោះនៅអ៊ុយក្រែនអាចដោះស្រាយបានតែនៅលើសមរភូមិប៉ុណ្ណោះ ដូច្នេះហើយ ទីក្រុង ព្រុចសែលនឹងបន្តផ្តល់ការគាំទ្រផ្នែកយោធាដល់ទីក្រុងកៀវ។

លោក De Croo កំពុងជួបជាមួយសមភាគីណាតូ សម្រាប់កិច្ចប្រជុំកំពូលនៅទីក្រុង ម៉ាឌ្រីដ នៃប្រទេស អេស្ប៉ាញ ចាប់ពីថ្ងៃអង្គារដល់ថ្ងៃព្រហស្បតិ៍។

លោក De Croo បាននិយាយមុនកិច្ចប្រជុំកំពូលថា “យើងក៏នឹងមានឱកាសធ្វើអន្តរកម្មជាមួយប្រធានាធិបតីអ៊ុយក្រែន Volodymyr Zelensky ផងដែរ។ ខ្ញុំគិតថា វាសំខាន់ណាស់ដែលយើងបន្តនិយាយជាមួយគាត់ ហើយបញ្ជាក់ច្បាស់ៗថា សង្រ្គាមនេះអាចឈ្នះបានតែនៅក្នុងសមរភូមិប៉ុណ្ណោះ ហើយយើងគួរតែបន្តគាំទ្រលោកប្រធានាធិបតី Zelensky និងប្រជាជនអ៊ុយក្រែនឲ្យបានច្រើនតាមដែលអាចធ្វើទៅបាន ដើម្បីអាចឈ្នះសង្រ្គាមនៅលើសមរភូមិ ប្រឆាំងនឹងការលុកលុយរបស់រុស្ស៊ី”។

ដោយឡែក ប្រមុខអង្គការណាតូ លោក Jens Stoltenberg បាននិយាយមុនកិច្ចប្រជុំកំពូលថា សម្ព័ន្ធមិត្តទាំងអស់ គ្រោងនឹងគាំទ្រគោលគំនិតយុទ្ធសាស្ត្រថ្មីមួយ ដែលនឹងសំដៅលើប្រទេសរុស្ស៊ីថា ជាការគំរាមកំហែងដ៏សំខាន់បំផុត និងដោយផ្ទាល់ចំពោះសន្តិសុខសម្ព័ន្ធមិត្ត។

សមាជិក​ក៏​នឹង​ពិចារណា​ផងដែរ ​អំពី​លទ្ធភាព​នៃ​ការ​បង្កើន​ចំនួន​អង្គភាព​យោធា​បន្ថែម​ទៀត​ដែល​ដាក់​ពង្រាយ​នៅ​ផ្នែក​ខាង​កើត​នៃ​សម្ព័ន្ធភាពនេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Sputnik

ចុចអាន៖ ពូទីន ថ្កោលទោស ណាតូ ថែមទាំងគំរាម ស៊ុយអែត និង ហ្វាំងឡង់