ក្រសួងសុខាភិបាល និងផ្នែកឯកជន រួមគ្នាស្វែងរកដំណោះស្រាយកង្វល់ វិស័យធុរកិច្ច

ក្រសួងសុខាភិបាល និងផ្នែកឯកជន បានរួមគ្នាស្វែងរកដំណោះស្រាយបញ្ហាប្រឈម និងកង្វល់នានាលើវិស័យធុរកិច្ចដែលកំពុងជួបប្រទះនាពេលបច្ចុប្បន្ន។

កិច្ចប្រជុំពិភាក្សាក្រុមការងារ ឋ “ផ្នែកសុខាភិបាល” នៃវេទិការាជរដ្ឋាភិបាល-ផ្នែកឯកជននេះ បានធ្វើនៅថ្ងៃទី ២៩ ខែមិថុនា ឆ្នាំ ២០២២ នេះនៅទីស្តីការក្រសួងសុខាភិបាល ក្រោមអធិបតីភាពលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាសហប្រធានក្រុមការងារតំណាងផ្នែករដ្ឋាភិបាល និង លោកឧញ៉ា លឹម ហេង អនុប្រធានសភាពាណិជ្ជកម្មកម្ពុជា និងជាអ្នកសម្របសម្រួលក្រុមការងារផ្នែកឯកជន លោកឧកញ៉ា វេជ្ជបណ្ឌិត តាន់ គីមមេង សហប្រធានក្រុមការងារ ឋ “ផ្នែកសុខាភិបាល” ផ្នែកឯកជន។

លោកសាស្ត្រាចារ្យ ម៉ម ប៊ុនហេង បានមានប្រសាសន៍ថា គោលបំណងនៃកិច្ចប្រជុំពិភាក្សានេះដើម្បីស្វែងរកដំណោះស្រាយរបស់វិស័យឯកជន បានស្នើសុំពិភាក្សា និងកំពុងជួបប្រទះក្នុងសកម្មភាពធុរកិច្ច វិនិយោគ។ បង្កើនការសម្របសម្រួល នឹងយល់ពីគ្នាទៅវិញទៅមក រវាង ក្រសួងសុខាភិបាល និងផ្នែកឯកជន។

លោករដ្ឋមន្ត្រីបានបន្តថា កិច្ចប្រជុំក៏ដើម្បីចូលរួមផ្តល់ជាធាតុចូលសំខាន់ៗ ទៅលើការអនុវត្តច្បាប់ដែលបានចេញដោយក្រសួង ពីផ្នែកឯកជន សម្រាប់ក្រសួងសុខាភិបាលធ្វើការពិចារណា និងធ្វើការកែលម្អចំពោះសកម្មភាពមិនច្បាស់ ឬអសកម្មនានា និងទទួលយកនៅមតិយោបល់ បទពិសោធន៍ និងព័ត៌មានសំខាន់ៗមួយចំនួនដែលបានចូលរួម ពីតំណាងស្ថាប័ន-ក្រសួងនានា ក៏ដូចជាដើម្បីទទួលបាននូវការណែនាំសម្រាប់ការអនុវត្ត ច្បាប់ទំលាប់ផ្សេងៗជាច្រើន ជូនដល់ វិស័យឯកជន ដើម្បីអនុវត្តឱ្យចំ និងកុំឱ្យមានចន្លោះខ្វះខាត នាំឱ្យខាតពេលវេលា៕

អត្ថបទ៖ សំអឿន