ពូទីន ថា ទណ្ឌកម្មលោកខាងលិចកំពុងរុញ រុស្ស៊ី បង្រួបបង្រួមជាមួយ ប្រទេសសម្ព័ន្ធមិត្តមួយនេះ

លោកប្រធានាធិបតី វ្ល៉ាឌីមៀ ពូទីន បាននិយាយថា “សម្ពាធនយោបាយ និងសង្គមដែលមិនធ្លាប់មានពីមុនមក” ពីលោកខាងលិច និងបណ្តុំនៃទណ្ឌកម្មដែលបានដាក់ បន្ទាប់ពីការលុកលុយលើអ៊ុយក្រែន កំពុងជំរុញឲ្យបេឡារុសធ្វើសមាហរណកម្មកាន់តែលឿនជាមួយរុស្ស៊ី ។

មេដឹកនាំរុស្ស៊ីវ័យ ៦៩ ឆ្នាំរូបនេះបានប្រាប់វេទិកាមួយកាលពីថ្ងៃសុក្រថា “សម្ពាធកំពុងជំរុញឲ្យយើងបង្កើនល្បឿនដំណើរការបង្រួបបង្រួមជាមួយបេឡារុស ហើយវានឹងត្រូវបានធ្វើឡើងដើម្បីកាត់បន្ថយការខូចខាតពីទណ្ឌកម្មខុសច្បាប់ ធ្វើជាម្ចាស់នៃទិន្នផលផលិតផលដែលត្រូវការ អភិវឌ្ឍសមត្ថភាពថ្មី ក៏ដូចជាដើម្បីពង្រីកកិច្ចសហប្រតិបត្តិការជាមួយប្រទេសជាមិត្ត” ។

សម្ព័ន្ធមិត្តទាំងពីរដែលមានព្រំប្រទល់ជាប់ជាមួយអ៊ុយក្រែន បាននិងកំពុងធ្វើសមាហរណកម្មគ្រប់ទម្រង់ ចាប់តាំងពីការចុះហត្ថលេខាលើសន្ធិសញ្ញាឆ្នាំ ១៩៩៧ សំដៅពង្រឹងទំនាក់ទំនងដែលតានតឹងក្រោយការរំលាយសហភាពសូវៀត ។

ទន្ទឹមនោះកាលពីថ្ងៃអាទិត្យ ខណៈដែលលោកប្រធានាធិបតី Alexander Lukashenko បានធ្វើទស្សនកិច្ចនៅទីក្រុង Saint Petersburg លោក ពូទីន បាននិយាយថា រុស្ស៊ីនឹងដាក់ពង្រាយកាំជ្រួចដែលមានសមត្ថភាពអាចផ្ទុកក្បាលគ្រាប់នុយក្លេអ៊ែរនៅក្នុងប្រទេសបេឡារុសក្នុងពេលឆាប់ៗនេះ ។

ចំណុចសំខាន់មួយទៀតនោះគឺកាលពីថ្ងៃទី ២៤ ខែកុម្ភៈឆ្នាំនេះ លោក Lukashenko ក៏បានអនុញ្ញាតឲ្យរុស្ស៊ីយកប្រទេសបេឡារុសជាទីតាំងចាប់ផ្តើមសង្គ្រាមលុកលុយលើអ៊ុយក្រែនផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ អាមេរិក ប្រាប់មូលហេតុ រុស្ស៊ី ដកទ័ពចេញពីកោះពស់