ភរិយានាយ តាក់ស៊ី ប្រកាសសុំជំនួយឈាម​ដើម្បីជួយ​សា្វមី ខណៈកំពុងសង្គ្រោះបន្ទាន់

នាយ តាក់ស៊ី ធ្លាក់ខ្លួនឈឺធ្ងន់ខណ:ប្រពន្ធប្រកាសសុំការផ្តល់ឈាមសង្គ្រោះជីវិតប្តីតារាកំប្លែងនាយ តាក់ស៊ី បានធ្លាក់ខ្លួនឈឺធ្ងន់ ខណ:ពេលនេះត្រូវបានភរិយានិងក្រុមគ្រួសារបញ្ចូនទៅសង្គ្រោះបន្ទាន់នៅមន្ទីរពេទ្យព្រះកេតុមា​លា​បង្កការភ្ញាក់ផ្អើលដល់អ្នកគាំទ្រនិងមហាជនជាថ្មី។

នៅគណនីហ្វេសប៊ុកឈ្មោះ Neay Taxi ដែលត្រូវបានគេដឹងថា ពេលនេះភរិយារបស់នាយ តាក់ស៊ី ជាអ្នកកំពុងប្រើប្រាស់បានរៀបរាប់ឲ្យដឹងនៅថ្ងៃទី០៦ ខែកក្ដដា ឆ្នាំ២០២២នេះថា ឥឡូវនាយ តាក់ស៊ី ដែលជាប្ដីកំពុងធ្លាក់ខ្លួនឈឺធ្ងន់ធ្ងរ ខណ:នាយក៏ត្រូវការបញ្ចូលឈាមជាច្រើនប្លោកជាបន្ទាន់ដើម្បីជួយសង្គ្រោះជីវិត។ ភរិយានាយ តាក់ស៊ី ក៏បានប្រកាសដោយអង្វរសុំជំនួយនៃការបរិច្ចាគឈាមពីសប្បុរជនផងដែរ។

ភរិយាតារាកំប្លែងនាយ តាក់ស៊ី បានលើកឡើងថា « អាណិតប្ដីណាស់ពេទ្យឯកជនអស់លទ្ធភាពមើលហើយ ដោយសារអាការៈរបស់គាត់ធ្ងន់ពេកត្រូវបញ្ជូនមកមន្ទីរពេទ្យទាហាន គឺមន្ទីរពេទ្យកេតុមាលា ហើយនាងខ្ញុំសុំឱ្យបងប្អូនជួយបរិចា្ចគ​ឈាមដល់ប្ដីខ្ញុំផងត្រូវការឈាមបន្ទាន់ណាស់ក្នុងថ្ងែនេះខ្វះឈាម៥ទៅ៨សាក់បានគ្រប់»។

ភរិយាតារាកំប្លែងរូបនេះបន្ថែមទៀតថា សូមបងប្អូនជួយបរិច្ចាគឈាមផងហើយបើបងប្អូនចង់មកសួរសុខទុក្ខគាត់សូមទាក់ទងតាមលេខទូរសព្ទគឺ 069 29 56 46,  061 75 83 37, 090 99 56 98។

ជាមួយគ្នានេះដែរគេក៏បានឃើញទិដ្ឋភាពជាក់ស្តែងដែលនាយ តាក់ស៊ី កំពុងដេកស្ដូកស្ដឹងនៅលើគ្រែពេទ្យយ៉ាងអាណិតទៀតផង។ ដំណឹងនេះក៏បានធ្វើឱ្យមហាជននិងអ្នកគាំទ្រជាច្រើនបង្ហាញការព្រួយបារម្ភចំពោះសុខភាពតារាកំប្លែងរូបនេះគ្រប់គ្នា៕

អត្ថបទ៖ ចាន់រ៉ា