នាវាមុជទឹកមីយ៉ាន់ម៉ា ​២​គ្រឿង​ ចូលរួម​សមយុទ្ធ​យោធា​នៅ ​រ៉ា​ឃីន​ បង្ហាញពីយុទ្ធសាស្ត្ររួមគ្នា ៣ប្រភេទ

ប្រភពព័ត៌មានបានឱ្យដឹងថា (Min Yaeteng Kathu – Min Yae Kyaw Tin) នាវាមុជទឹកចំនួន ២គ្រឿងរបស់មីយ៉ាន់ម៉ាចូលរួមសមយុទ្ធកងទ័ពជើងទឹករួមគ្នានៅឆ្នេរសមុទ្ររ៉ាឃីន ស្ថិតក្រោមយុទ្ធសាស្ត្ររួមគ្នា ៣ប្រភេទ គឺនាវាចម្បាំង នាវាមុជទឹក និងយន្តហោះ។

កាលពីថ្ងៃទី៥ ខែកក្កដា លោក មីន អ៊ុងឡាំង ប្រធានក្រុមប្រឹក្សារដ្ឋក្នុងឋានៈជាអគ្គមេបញ្ជាការកងទ័ពមីយ៉ាន់ម៉ា បានចូលរួមសមយុទ្ធដែនសមុទ្រ (Sea Shield-2022) ដែលធ្វើឡើងនៅឆ្នេរសមុទ្រនៃរដ្ឋរ៉ាឃីន ក្នុងឈូងសមុទ្រ Bengalដោយមាននាវាចម្បាំងចំនួន ២០គ្រឿង និងឧទ្ធម្ភាគចក្រទ័ពអាកាសមួយចំនួនចូលរួមក្នុងសមយុទ្ធនេះផងដែរ។

ការធ្វើសមយុទ្ធដែនសមុទ្រ Sea Shield-2022នេះ បានចាប់ផ្តើមតាំងពីថ្ងៃទី១ ខែកក្កដា ឆ្នាំ២០២២។ ចំណុចលេចធ្លោនៃសមយុទ្ធនៅឆ្នាំនេះ គឺការហ្វឹកហ្វឺនសមរភូមិប្រយុទ្ធរួមគ្នា ៣ប្រភេទ (Three Dimensional Combat Ready Navy ) រវាងនាវាចម្បាំង នាវាមុជទឹក និងយន្តហោះ៕

អត្ថបទ៖ គង់ សំអាន