លោក សុន ឆ័យ ចូលបំភ្លឺនៅតុលាការ តាមបណ្ដឹងរបស់មេធាវីគណបក្សប្រជាជនកម្ពុជា

លោក សុន ឆ័យ អនុប្រធានគណបក្សភ្លើងទៀន នៅព្រឹកថ្ងៃទី ១៥ ខែកក្កដា ឆ្នាំ ២០២២នេះ បា​នចូលខ្លួនទៅអយ្យការអមសាលាដំបូងរាជធានីភ្នំពេញ ដើម្បីឆ្លើយបំភ្លឺទៅនឹងបណ្ដឹង របស់មេធាវីគណបក្សប្រជាជនកម្ពុជា។ នៅព្រឹកម៉ោងប្រមាណជា ៩នេះ លោកមេធាវី ជួង ជូ​ងី បានជូនដំណើរលោក សុន ឆ័យ ចូលទៅអយ្យការអមសាលាដំបូងរាជធានីភ្នំពេញ ដើម្បីឆ្លើយបំភ្លឺ។

សូមជម្រាបថា លោក គី តិច មេធាវីតំណាងគណបក្សប្រជាជនកម្ពុជា កាលពីថ្ងៃទី ១៤ ខែមិថុនា ឆ្នាំ ២០២២កន្លងទៅនេះ បានសម្រេចប្តឹងលោក សុន ឆ័យ អនុប្រធានគណបក្សភ្លើងទៀន ពាក់ព័ន្ធការចោទ និងបំភ្លៃជុំវិញដំណើរការបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី ៥ ដោយស្នើសុំឲ្យតុលាការផ្តន្ទាទោសតាមច្បាប់ និងទាមទារសំណងជំងឺចិត្ត ៤ពាន់លានរៀល ឬស្មើនឹង ១លានដុល្លារអាមេរិក៕

អត្ថបទ៖ មករា