កម្ពុជា នាំចេញដំឡូងមី បានជាង ២លានតោន កើនឡើង ៤០ភាគរយ

កម្ពុជា បាននាំចេញដំឡូងមី ២.៣លានតោន កើនឡើងប្រមាណ ៤០ភាគរយ បើធៀបនឹងរយៈពេលដូចគ្នាកាលពីឆ្នាំមុន គិតត្រឹមឆមាសទី១ ឆ្នាំ២០២២ ។

យោងតាមអគ្គនាយកដ្ឋានកសិកម្ម នៃក្រសួងកសិកម្ម បានបង្ហាញថា កម្ពុជាសម្រេចបានការនាំចេញនូវផលិតផល​ដំឡូងមី​សម្រាប់ឆមាសទី១ ឆ្នាំ២០២២ មានចំនួន ២លាន តោន កើនឡើង៤២.៥៥ភាគរយ បើធៀបនឹងរយៈពេល​ដូចគ្នាឆ្នាំ២០២១ មានចំនួន ជាង១លាន តោន។

ចំពោះផលិតផលដំឡូងមី ដែលត្រូវបាននាំចេញរួមមាន៖ ចំណិតដំឡូងមីក្រៀម មានចំនួន១ លាន ៥សែនតោន កើនឡើងចំនួន២៤,២៥ភាគរយ ក្នុងនោះនាំចេញទៅប្រទេសថៃចំនួន១ លាន១សែនតោន និងប្រទេសវៀតណាមចំនួន ៤០ម៉ឺនតោន។ ដំឡូងមីស្រស់ មានចំនួន ៧១ម៉ឺនតោន កើនឡើងចំនួន ៩៧.៩៧ភាគរយ ក្នុងនោះនាំចេញទៅ​ប្រទេសវៀតណាម ចំនួន៤៧ម៉ឺនតោន និងប្រទេសថៃចំនួន២៣ម៉ឺនតោន។ ម៉្សៅដំឡូងមីមាន ចំនួន៤៨ម៉ឺនតោន កើនឡើងចំនួនជាង២០០ភាគរយ ក្នុងនោះនាំចេញទៅប្រទេសចិនចំនួន៤៧ម៉ឺនតោន, សហរដ្ឋអាមេរិកប្រមាណ​៦០០តោន, អ៊ីតាលីជាង៣០០តោន, វៀតណាមជាង២០០តោន, ណេដឺឡែនជាង១០០តោន, ថៃជាង៩០តោន និងម៉ាឡេស៊ីមានជាង ៣៨តោន។

ចំណែកកាកសំណល់ដំឡូងមី មានជាង ៧ពាន់តោន កើនឡើងចំនួន ៦៣.៨១ភាគរយ នាំចេញទៅប្រទេស​ចិនចំនួន៦ពាន់​ ៥រយតោន និងប្រទេសវៀតណាមមាន ជាង៥០០តោន។

ប្រទេសវៀតណាម និងថៃ នាំចូលដំ ឡូងមីក្រៀម និងដំឡូងមីស្រស់ ចំណែកអាម៉េរិក, ណេដឺឡែន, ចិន, ម៉ាឡេស៊ី និងអ៊ីតាលីបាននាំចូលម្សៅដំឡូងមី ពីកម្ពុជា។

បើតាមទិន្នន័យពីក្រសួងកសិកម្ម រុក្ខាប្រមាញ់ និងនេសាទ បានបង្ហាញទៀតថា  ការនាំចេញដំឡូងមី និងផលិតផលដំឡូងមីរបស់កម្ពុជា ក្នុងឆ្នាំ២០២១កន្លងទៅ សម្រេចបានប្រមាណ២លាន ៧សែនតោន៕