ឆេះឡសម្ងួតពោតទាំងកណ្តាលអធ្រាត្រ ខូចខាតអស់ទាំងស្រុង

គ្រាប់ពោតប្រមាណ៥តោន និងស្នូលពោតប្រមាណ១៥តោន រួមទាំងឡសម្ងួតទាំងមូល ត្រូវបានអគ្គិភ័យឆាបឆេះគ្មានសល់ បន្ទាប់ពីមានការឆេះឆ្លងតាមរយ:ស្នូលពោត ។

ហេតុការណ៍ដែលបង្កអោយមានការភ្ញាក់ផ្អើលនេះ បានកើតឡើងនាថ្ងៃទី២២ ខែកក្តដា ឆ្នាំ២០២២ វេលាម៉ោង១និង១៥ នាទីរំលងអាធ្រាត្រ ក្នុងទីតាំងឡសម្ងួតមួយកន្លែង ស្ថិតក្នុងភូមិបាដាកត្បូង ឃុំរស្មីសង្ហារ ស្រុករតនមណ្ឌល ខេត្តបាត់ដំបង។

បើតាមការរៀបរាប់ពីម្ចាស់ទីតាំងឈ្មោះ ណុប ទូច ភេទស្រី អាយុ៥៤ឆ្នាំ បាននិយាយថា មូលហេតុដែលបង្កទៅជាអគ្គិភ័យនេះ គឺផ្តើមចេញពីការឆេះស្នូលពោតនៅក្នុងឡសម្ងួតពោត ។

ម្ចាស់ទីតាំងបានបន្តថា ការខូចខាតរួមមាន គ្រាប់ពោតចំនួន៥តោន ឆេះស្នូលពោតចំនួន១៥តោន និងឡសម្ងួតដែលមានទំហំ ៨ម៉ែត្រx១៦ម៉ែត្រ គឺខូចខាតទាំងស្រុង សរុបជាទឹកប្រាក់អស់ប្រមាណជិត១មុឺនដុល្លារ ​ហើយនៅក្នុងករណីនេះដែរ គឺមិនបណ្តាលអោយមានរងរបួសមនុស្សទេ ៕

អត្ថបទ៖ សោ និយមរ័ត្ន