កីឡា

កីឡាករថៃម្នាក់ ត្រូវអ្នកគាំទ្រទទូចឱ្យត្រលប់មកស្រុកកំណើតវិញ ក្រោយពុំទាន់បានបង្ហាញខ្លួននៅលីគជប៉ុន

បានផុស

៣ years មុន

នៅ

ថ្ងៃសុក្រ ២២ កក្កដា ២០២២

ដោយ

បន្ទាប់ពីខ្សែបម្រើជម្រើសជាតិថៃ របស់ក្លិប Buriram United កីឡាករ Supachok Sarachat បានផ្លាស់ទៅក្លិប Consadole Sapporo ក្នុងក្របខ័ណ្ឌលីគកំពូលជប៉ុន (J-League 1) ក្នុងលក្ខខណ្ឌខ្ចីជើងរយៈពេល ៦ ខែ។ ប៉ុន្តែរហូតមកដល់ពេលនេះ ជាងមួយខែបានកន្លងផុតទៅ គេមិនទាន់មានឱកាសបានលេងសូម្បីតែមួយនាទីនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បែបនេះបានធ្វើឱ្យអ្នកគាំទ្របាល់ទាត់ថៃ ពិសេសអ្នកគាំទ្រក្លិប Buriram ឆ្ងល់ថាហេតុអ្វី? ដោយសូម្បីតែឈ្មោះក្នុងកៅអីបម្រុងក៏មិនមាន។ អ្នកគាំទ្រខ្លះថែមទាំងបានទទូចឱ្យ Supachok ត្រលប់មក Buriram វិញ ដើម្បីបន្តលេងនៅលីគថៃ (Thai League) ដូចកាលពីមុន។

យ៉ាងណាមិញ លោក Mihailo Petrovic អ្នកចាត់ការក្រុម Consadole Sapporo បាននិយាយហេតុផលមិនដាក់ Supachok ឱ្យលេងគឺដោយសាររូបគេមិនទាន់រួចរាល់។ «Suphachok ទើបតែចាប់ផ្តើមស្គាល់ពីកលល្បិចរបស់ក្រុម។ ប៉ុន្តែគាត់នឹងនៅតែត្រូវការពេលវេលាខ្លះដើម្បីកែសម្រួលអារម្មណ៍ និងស្ថានភាពនៃការប្រកួត។ ដើម្បីនាំវាទៅកម្រិតមួយដែលគេអាចលេងក្នុង J-League។» សម្ដី លោក Mihailo Petrovic។ លោកបន្តទៀតថា៖ «បន្ថែមពីលើស្ថានភាពបច្ចុប្បន្នរបស់ក្រុមនៅពេលនេះ គឺមិនល្អខ្លាំង (ត្រូវតែគេចចេញពីការកាត់ចោល) ដូច្នេះវាមិនងាយស្រួលទេសម្រាប់ពួកយើងក្នុងការដាក់គេចូលលេង។»

សម្រាប់ក្រុម Consadole Sapporo បច្ចុប្បន្នកំពុងឈរនៅលេខរៀងទី ១៤ មានតែ ៣ ពិន្ទុប៉ុណ្ណោះលើក្រុមដែលនៅក្នុងតំបន់កាត់ចោល។ ចំណែកកីឡាករថៃដែលផ្លាស់ទៅលេងនៅ J-League បច្ចុប្បន្នមាន ៣ នាក់ គឺ កីឡាករ Chaowat Weerachat លេងឱ្យ Cerezo Osaka ក្នុងលក្ខខណ្ឌខ្ចីជើង, កីឡាករ Chanathip Songkrasin (Kawasaki Frontale) និង Supachok Sarachat (Consadole Sapporo) នេះផ្ទាល់៕

អត្ថបទ៖ មន្នីរ័ត្ន

Related Topics:កីឡាករបាល់ទាត់អន្តរជាតិ