អាជ្ញាធរ​ខេត្តស្ទឹងត្រែង​ឱ្យប្រជាពលរដ្ឋ​ចូលរួម​សម្អាតបរិស្ថាន​ និងឈប់ចោល​សំរាមរាយប៉ាយ

អាជ្ញាធរខេត្តស្ទឹងត្រែងបានដាស់តឿនឱ្យប្រជាពលរដ្ឋនៅក្នុងក្រុងទាំងអស់ឱ្យភ្ញាក់រលឹកចូលរួមសម្អាតបរិស្ថាន ដើម្បីជួយលើកកម្ពស់សោភណ្ឌភាពទីក្រុងស្អាត ក្នុងពេលដែលអាជ្ញាធរបានប្រឹងប្រែងធ្វើកិច្ចការងារនេះ នៅតាមទីសាធារណបានល្អហើយ។

លោក សាយ កុសល អភិបាលក្រុងបានបញ្ជាក់ថា៖ នៅតាមទីសាធារណអាជ្ញាធរបានប្រឹងប្រែងធ្វើបានល្អហើយ នៅតែបងប្អូនមួយចំនួនប៉ុណ្ណោះ ដែលយកសំរាមទៅចោលរាយប៉ាយធ្វើឱ្យប៉ះពាល់ផ្នែកសោភ័ណភាពក្នុងក្រុង។

លោកបន្តថា ភាពស្អាតកើតចេញពីបងប្អូនប្រជាពលរដ្ឋទាំងអស់គ្នាដូច្នេះត្រូវចូលរួមបង្កើនការសម្អាតបរិស្ថាននៅជុំវិញផ្ទះរបស់ខ្លួន ដើម្បីចូលរួមចលនាទីក្រុងស្អាត ភូមិល្អដែលសាលាក្រុងបង្កើតឡើង។

លោក សាយ កុសលនឹងបង្កើតក្រុមការងារមួយ និងតំបន់ចលនាលំនៅដ្ឋាន ភូមិស្អាត ដែលជាទីក្រុងស្អាត ពិសេសផ្លូវលេខ ២ ជាគំរូ តាមផ្ទះទាំងអស់ត្រូវតែកាត់ស្មៅមុខផ្ទះមិនមែនយើងនិយាយតែរឿងសំរាមមួយទេ ខណៈសំរាមអាជ្ញាធរបានពង្រឹងបានសឹងតែស្ថាពរហើយ នៅតែតាមទីសាធារណៈ និងការចូលរួម។

លោក ឡុង លីប៉ូ តំណាងឱ្យប្រជាពលរដ្ឋនៅក្រុងស្ទឹងត្រែងបានគាំទ្រលើចលនាធ្វើឱ្យភូមិស្អាតនេះព្រោះពេលទីក្រុងមានសោភ័ណភាពភ្ញៀវទេសចរមកលេងកម្សាន្ត និងលើកសរសើរ ហើយបានមកលេងម្តងហើយចង់មកម្តងទៀត។

លោកសំណូមពរទៅអាជ្ញាធរក្រុង និងសមត្ថកិច្ចពាក់ព័ន្ធឱ្យបង្កើនការអនុវត្តច្បាប់ ដោយធ្វើការផាកពិន័យចំពោះបុគ្គលមិនចូលរួមសម្អាតបរិស្ថាននិងយកសំរាមទៅចោយរាយប៉ាយ ជាងនេះទៀតអ្នកចិញ្ចឹមសត្វលែងដើរពាសវាលពាសកាល និងទៅស៊ីដំណាំប្រជាពលរដ្ឋបន្ថែមទៀត។

លោក សេង វីរៈនាយករងរដ្ឋបាលក្រុងស្ទឹងត្រែងបានបញ្ជាក់ថា៖​ ​រាល់បញ្ហាខាងលើនេះអាជ្ញាធរមានសមត្ថកិច្ចបានណែនាំនិងផ្សព្វផ្សាយជាញឹកញាប់រួចមកហើយ រាប់បញ្ចូលទាំងការធ្វើសកម្មភាពសម្អាត់ទីក្រុងផងដែរ ដើម្បីដាស់ស្មារតីប្រជាពលរដ្ឋទូទៅឱ្យស្រឡាញ់បរិស្ថាន។

លោកបន្តថា៖ បញ្ហាចោទបច្ចុប្បន្ននៅមានបុគ្គលតិចតូចតែប៉ុណ្ណោះដែលមិនទាន់ចូលរួមអនុវត្តតាមការណែនាំ ហើយភាពរឹងត្អឹងនេះ ចាប់ពីពេលនេះទៅសមត្ថកិច្ចនិងតាមដានបើរកឃើញគង្វើរណាមួយមិនគាប្បី ត្រូវផាកពិន័យតាមច្បាប់អន្តរក្រសួង ដែលអាជ្ញាធរផ្សព្វផ្សាយរួចមកហើយនោះ។

សូមបញ្ជាក់ថា៖ ក្រុងស្ទឹងត្រែងត្រូវបានគណៈកម្មាធិការថ្នាក់ជាតិរៀបចំប្រលងប្រណាំងទីក្រុងស្អាត មកពិនិត្យវាយតំលៃពីលើករួចមកហើយ ដើម្បីរៀបចំដាក់ពិន្ទុត្រៀមទទួលយកស្លាកសញ្ញាផ្ការំដួលចាប់ពី១ទងទៅដល់៣ទងចំពោះទីក្រុង​ណាមានសោភណ្ឌភាពបៃតងល្អក្នុងពេលវាយតម្លៃលើកទី៣ម្តងទៀត៕

អត្ថបទ៖ ងិនលីម